Christmas Party gipatigayon sa mga batan-on

Nalingaw pag-ayo ang mga kabatan-onan sa gipatigayong Christmas party niadtong Disyembre 16, 2018 sa Fatima Center, Digos City, Davao del Sur.

Ang maong party giapilan sa mga batan-on sa nagkadaiyang sona ug pundok sa parokya sa Mary Mediatrix (MMC). Walay hunong nga kahugyaw ang nasinati sa mga batan-on. Matod pa ni Ariel Maglupay, seminarista sa Diyosesis sa Digos, nga nindot ang kalihokan sa batan-on karon kay hugyaw kaayo gikan pa sa Year of the Youth launching hangtod sa Christmas party. Sa dihang gisugdan na ang Prex animation, maanindot nga pahiyom ug katawa ang makit-an sa mga nawong sa mga batan-on samtang nakigsandurot sa usa’g usa.

Misamot pa gayud ang kahugyaw sa maong party tungod sa mga pinasahi na padula o parlor games ug mga pa-raffle draw. Nakapadugang usab sa kahugyaw ang mga kuyaw nga presentasyon. Ug isip panapos sa maong party, pinangunahan sa mga Tuburan Community, gipadayon ang maong kahugyaw tungod sa gipatigayon nga Youth Jam. Matod pa ni Lovely Grace Aldaba, batan-on sa sona 2, GKK Sr. Santo Niño, Palma Ruparan, Digos City, nga makalingaw ang maong party basta dili lang magpaulaw-ulaw. Matod usab ni Airish Pagaora, batan-on sa nasangpit nga GKK, nga makalipay ug exciting ang maong party. (Sem. Rayjohn Doblas | SUGID)