Bulahan sa babaye nga tanan

Ika-upat nga Domingo sa Adbiyento
Mi. 5:1-4 / Ps. 80:2-3, 15-16, 18-19 / Heb. 10:5-10 / Lk. 1:39-45

Bulahan ka sa tanang mga babaye! Adunay duha ka rason kon nganong bulahan si Maria; una, isip takos na pinili sa Ginoo nga maong magmabdos sa iyang Anak nga si Hesus, ang Manluluwas nga gisaad sa mga propeta. Ika-duha, ang dakong pagsalig ug kinakasing-kasing nga pagdawat ni Maria sa kabubut-on sa Ginoo ug sa iyang maayong plano kaniya.

Ang pagpili sa Ginoo kang Maria naghatag kaniya ug halangdon nga lugar labaw sa tanang tawo. Sa atong pagtoo ilabina sa tudlo sa atong simbahan, si Maria gipanamkon nga walay sala sa dihang gisabak pa siya ni Sta. Ana, iyang inahan, aron siya usab mamahimong takos sa pagmabdos kang Hesus. Ang anghel ug ang iyang ig-agaw nga si Santa Isabel nagpadayag nga si Maria bulahan sa tanang babaye. Busa usa kini nga nagpamatuod ug nagpahigayon nga ang langit ug ang yuta kinahanglan ilhon si Maria isip inahan sa atong Ginoong Hesukristo.

Ang dakong pagsalig ni Maria sa Ginoo ug sa iyang plano nagpadayag nga siya andam mo tahan ug muhatag sa iyang kaugalingon alang sa tanan. Makita kini sa iyang pagbisita sa iyang ig-agaw, nga si Isabel, aron kumustahon kini sa iyang pagmabdos, maskin layo ug lisod ang pag-adto. Wala lamang gi-isip ni Maria iyang kaugalingon.

Sa atong pagpamalandong, kita gi-awhag sa pag-ila kang Maria nga Inahan sa atong Ginoong Hesukristo. Kita usab gi-awhag sa pagpuyo sama sa kinabuhi ni Maria nga walay sala aron kita mamahimong takus ug angayan sa atubangan ni Hesus ilabina sa atong pagsaulog sa Eyukaristiya. Gitawag usab kita sa paghatag sa atong kaugalingon diha sa uban pinaagi sa paghatag ug oras sa nanginahanglan natong mga kaigsoonan. Kining tanan, ang pagpaningkamot sa pagpuyo sa kinabuhing putli og walay sala ug diha sa atong pagtabang sa nanginahanglan, makapadala kanato sa kasinatian nga gipasalig sa atong Ginoong Hesukristo kanato nga mao ang tumang kalipay uban kaniya diha sa Gingharian sa Diyos diri sa yuta ug labaw na didto sa langit. (Rev. Ramon C. Jamora, Jr.)