Bishop-Elect Lunas, nangamuyo sa pag-ampo sa katawhan

Nagsagol ang gibati sa magtutuo sa Diocese sa Digos sa dihang gi anunsyo ni Bishop Guillermo Afable, D.D. niadtong Nov. 22, 2018 sa alas syete sa gabii nga hingpit na nga gipili ni Papa Francisco si Rev. Fr. Ronald Lunas, STL nga mamahimong magdala isip Obispo sa Diocese sa Pagadian, Zamboanga del Sur.

Niadtong tungura daghan ang nalipay sa maong pag anunsyo apan aduna say tataw ug dayag nga makita nga luyo sa ilang kasadya anaa sab ang kaguol nga mawad-an na og usa ka buotan ug balaan nga pari ang Diocese, ilabina gayud nga naglisod ang mga parokyano sa St. Joseph the Worker Parish, Santa Cruz Davao del Sur diin siya ang nahimong Kura paroko.

Samtang gipamahayag usab ni Bishop-Elect Lunas nga nagsagol usab ang iyang gibati sa dihang gipahibalo siya sa Papal Nuncio niadtong miaging semana sa iyang bag-ong tahas, anaa ang kahingawa ug kahadlok sa umaabot, ilabina nga wala siya na sweto ug wala siyay kaila sa Pagadian, apan siya mibutyag nga nasayod siya nga niining mga bag-ong tahas wala siya mag-inusara tungod nag-uban kaniya ang Ginoo ug anaa ang suporta sa katawhan kaniya “busa ang plano sa Dios mao ang matuman, wala man gyud ko maghuna-huna nga ma Obispo, ang akoa lang mag-alagad sa Ginoo, pagka pari ra gayud ang akong pangandoy, gani naa na ko sa 26 ka tuig sa pagka pari,” sigun ni Bishop-Elect Lunas.

Sumala sa iyang mensahe sa mga magtutuo sa Diocese sa Pagadian nga ilhon siya nga kauban ug usa ka igsoon ingon man tawagon lamang siya sa pangalan nga Fr. Bong tungod wala siya ma-usab, hinoon aminado siya nga nadugangan ang iyang mga gimbuluhatun apan wala siya ma bag-o.

“Mapasalamaton ko sa katawhan, ilabina sa mga parokyano sa St. Joseph tungod naka uban nako sila, ug sa ilahang dili malimot nga dakong suporta sa ministriya diha sa parokya, dili pako dayun molakaw, tilukon usa nako ang nahabilin nga panahon, naa pa koy upat ka bulan. Makig uban gihapon ko sa katawhan,” Dugang ni Bishop-Elect Lunas, apan dugang pangamuyo niya nga dili siya kalimtan ilabina sa mga pag-ampo.

Nahibaloan sa pagpanubay nga kasamtangang Vicar for the Clergy sa Diocese sa Digos si Bishop-Elect Lunas, gipanganak sa Barangay Bala, Magsaysay, Davao del Sur, gi-ordinahan sa pagkapari Santo Nino Parish sa maong lungsod niadtong Abril 7, 1992.