Adbiyento gisaulog ngadto sa pinakagamay nga Simbahan

Gidasig sa Kura Paroko nga si Rev. Fr. Leonardo “Fr. Bong” A. Dublan, Jr. ang mga GKK Servant Leaders sa St. Joseph the Worker Parish, Sasa nga pakusgan pa ang pagmugna og Pundok Banay kay anaa pa ang kainit, kaikag sa matag usa sa pakig-suod ug paglambigitay sa matag usa, human sa Pundok Banay Bible Rosary niadtong Oktubre, karon nga misulod na kita sa adbiyento himuon ang ikaduhang kalihukan.

Gilunsad ang Pundok Banay Advent Celebration (PBAC) niadtong Disyembre 1, Sabado alas 6 sa buntag diha sa Santos nga Misa nga gisaulog ni Fr. Bong Dublan ug gipahigayon ang Pagpadala sa mga PSL bitbit ang Advent Wreath, sa mga PSK dala ang tamdanan sa pag-ampo ug ang mga Treasurers dala ang “Charity box” ug kini dad-on nila sa ilang tagsa-tagsa ka mga GKK ug sa pagka-gabii panahon sa Kasaulogan sa Pulong ipahigayon ang Pagpadala sa mga Tigpasayon sa Pundok Banay (TPB) o “in-charge”.

Si Fr. Bong sa iyang homiliya nagkanayon, kining atong pagsaulog sa Adbiyento maoy pagpadayag sa kristohanong kinabuhi nga mabinantayon, maandamon sa pag-abot sa adlaw sa kasumaran sa pagkatawo ni Jesus ug sa atong pagpaabot sa ikaduhang pagbalik ni Jesus. Kini ang kahigayonan nga magbinantayon kita aron dili mahulog sa mga lit-ag nga nagpalibot kanato ug masinati ang espiritu sa pagbantay pinaagi sa pag-ampo kauban sa laing pamilya.

Matod pa ni Fr. Bong sa iyang sulat Pahayag, ang PBAC usa ka panagtigom sa mga membro sa pundok banay diha sa pag-ampo sulod sa panimalay. Kini inubanan sa pagdagkot sa Advent Wreath nga maoy sentro sa atong Advent Celebration. Kining maong kristohanong mithi mao gayud ang gipangandoy nga ma-anaa sa atong tagsa-tagsa ka pamilya labina karong kapaskuhan.

Sa imong pagtugot nga mopasaka ikaw sa imong panimalay ug sa pag-apil ngadto sa laing panimalay usa ka mithi nga ang imong pag-ampo alang sa kauban maoy susi sa kalampusan sa kahiusahan.

Adbyento maoy “gamay nga kuwaresma” isip pagpangandam sa Pasko sa Pagkatawo ni Jesus. Kini nagdala sa espiritu sa pag-ampo, sakripisyo ug paghalad. Ang natigum nga kantidad sa halad gamiton alang sa paghimo sa “Gift Giving” sa pasko sa mga kabus nga mga igsoon.

Alang sa kalampusan niining atong pagpanaw sa kahiusahan gigasahan ang parokya og tinuod nga magbalantay nga mao ang Kura Paroko nga si Fr. Bong Dublan, Jr. aron ang mga parokyano makasinati sa tinuod nga diwa sa pagpangandam ug mabinantayon sa umaabot nga pagsaulog sa pagkatawo ni Jesus. (Amie Desquitado | SJWP SoCCom)