56th Araw ng Malabog gisaulog

Malinawon, mabulokon ug malipayon ang mga taga-Malabog sa pagsaulog sa ika-56 ka tuig sa Araw ng Barangay Malabog niadtong Nobyembre 22, 2018.

Gisugdan kini sa usa ka Santos nga Misa nga gipangulohan sa among kura paroko sa San Roque Parish Malabog nga mao si Rev. Fr. Arnold Balaquinto. Diha sa iyang homiliya nga gikuha sa tema: Turismo palamboon aron sa maluntarong kalinaw; Gugma, pagsinabtanay ug pagrespetohay aron makab-ot ang tinooray na kalinaw. Dayon gipanalanginan ni Fr. Arnold ang tanang mga barangay officials, SK officials ug mga functionaries sa barangay.

Human sa misa gisunod dayon ang mga activities hangtod gabii. Parada sa mga nagkalain-laing sector sa barangay, float parade, pagpasundayag sa RM Cebu acrobat show ug isa sa gihulat sa mga tao ang pag-abot sa atong halangdong Mayor sa Davao City nga si Mayor Inday Sara Duterte. Iyang mensahe sa katawhan sa Malabog labina sa mga kabataan na magtoon ug tarong aron molampos sa pagskwela ug makakita ug maayong trabaho; sa mga ginikanan na dili magpadaghan ug anak aron dili magkalisod; sa mga sibilyan neutral lang ta; sa mga NPA ang paghangyo nga suportahan ang atong gobyerno, ug aduna pa siyay pahabol sa mga driver nga dapat mag-helmet ug dili magpahubog kay kung madisgrasya dili macover sa lingap.

Daghan mga bisita ang nangabot niadtong higayona sama sa mga City Councilors, labina ang mga ahensya sa gobyerno nga naghatag og mga serbisyo sama sa City Vet, DA, City Health, City Coop, City Agriculture, CENRO ug CSSDO. Ug nagpadayon ang mga programa nga gipanguluhan sa mga SK councils ug barangay officials ug sa among kapitan nga si Kapitan Jessie Candia Areja. Mapasalamaton si kapitan Jessie sa mga PNP (Philippine National Police), Paquibato Police, mga sundalo sa 16th IB ug mga barangay auxillary, mga tanod, nga nahimong malinawon ang Araw ng Malabog. Sa mga bisita ug sa tanang nisalmot sa mga aktibidades sa barangay, daghang salamat!