Sukod sa Pagkamanggihatagon

Ika-32 nga Domingo sa Ordinaryong Panahon
1 Hari 17:10-16 / Hebreo 9:24-28 / Markos 12:38-44 o 12:41-44

Unsa man ang sekreto sa Iyang pagkamanggihatagon alang niadtong adunay sakit sa kanser? Pangutana sa usa ka manunulat ngadto sa iladong tawo sa katilingban. Matud pa niya, kinsa sa kanunay mihatag didto sa usa ka balay-alima ug salapi alang sa mga adunay sakit nga kanser: “Tungod kay daghan na ang akong naipon nga bahandi, ug daghan usab ang mga tawong nagkinahanglan sa panabang.” Daghan sa mga bahandianon ang naghunahuna sa sama niining panghunahuna. Tinuod nga kon kini lamang ang atong rason nga kita mag-manggihatagon, daw adunay dakung kakulangon. Usa lamang kita ka pilantropo. Alang sa mga Kristyano nga adunay pagtuo sa Dios, ang sekreto sa pagkamanggihatagon anaa sa pagsalig ngadto sa Usa kinsa dili gayud mopakyas sa paghatag-sa tanan nga nagkinahanglan sa panabang. Siya mao ang atong mahigugmaong Amahan. Kon isipon sa tawo nga ang iyang mga nadawat nga mga grasya , dili gikan kaniya ug kining tanan mga gasa, segurado gayud nga siya mahimong malipayon nga manggihatagon. Mao kana ang tawo nga mapasalamaton, busa tungod niini, wala siyay laing buhaton kondili magpaambit sa unsa nga anaa kaniya ngadto sa uban. Ang sukod sa pagka-manggihatagon dili ang pisikal nga gidaghanon sa mga butang o salaping gipaambit, apan diha sa kasingkasing nga manggihatagon. Ug ang kasingkasing nga manggihatagon malipayon. Sama ra sa giingon ni Papa Francisco nga kon ang matag buhat nato ug maayo ngadto sa atong isigka-tawo, puno sa gugma, maaninaw usab ang kalipay nga nagpungasi diha sa iyang kinabuhi.

Ang temporaryo nga pagkawala sa salapi o maong kantidad nga gipaambit o gihatag, alang sa tawong manggihatagon, gihunahuna niya nga kini dili usa ka kakulangan o kawad-on apan usa lamang kini ka pamaagi sa pagmugna og spacio o luna alang sa mas dako pa gayud nga gasa ug grasya nga moabut.

Tan-awon nato ang gibuhat sa biyuda didto sa templo. Matud pa, mao na lamang gayud kadto ang iyang pipila ka mga dinaryo alang sa iyang pagkaon, aron nga mabuhi, apan gipaambit niya kini didto sa templo. Sa pag-amot sa tanan nga iyang bahandi ang biyuda diha sa atong Ebanghelyo nagpakita sa iyang tinuod nga pagsalig nga ang Kamaayo –o Providensya sa Dios dili motugot nga siya makasinati og kakulangan. Ang iyang pag-amot nahitabo nga wala makita ni tagda sa mga tawo nga nag-alirong kaniya, gawas kang Jesus kinsa nagabasa sa mga kasingkasing sa tawo. Usa usab kini ka maayong balita alang kanato. Nga diay ang tanang atong binuhatan, gamay man o daku, makit-an gayud niya. Apan, sa laing bahin, kon makasala usab kita, gamay man o daku, dili gayud makalingkawas sa iyang atensyon. Gidayeg ni Jesus ang gibuhat sa balo, ug gihimo niya siya nga usa ka modelo sa pagkamanggihatagon alang sa tanang kaliwatan. Pamalandongan nato og susihon ang kaugalingon kon unsay nagpaluyong hinungdan sa atong pagka-manggihatagon? Ilhon usab unta nato ang mga maayong nabuhat sa uban ngadto kanato! (Sr. Rica Dalaguit, FsP)