St. Francis Xavier 121st Parochial Fiesta gisaulog

Manay, Davao Oriental – Ang katawhan sa parokya sa St. Francis Xavier, Manay, Davao Oriental, Diocese of Mati, nagsaulog sa ika-121 kapistahan ug Araw ng Manay niadtong Oktubre 25, 2018. Ang tema sa maong pagsaulog “Mapasalamaton ug nagkahiusang Manayan alang sa pagbag-o sa simbahan.”

Ang maong tema nagapadayag sa pagtambayayong sa mga katawhan diha sa gobiyerno ug sa simbahansa pagbag-o sa balay sa Ginoo. Gibuhat usab ang pagpahinungod sa maong bag-ong nahuman nga simbahan pinangunahan sa Obispo sa Mati, Abel C. Apigo, DD sa alas 9:00 sabuntag ug misunod dayon ang Santos nga Misa diin gitambungan sa mga pari sa diocese sa Mati ug mga opisyales sa Davao Oriental diin mitambong ang gobernador sa probinsiya, Nelson L. Dayanghirang, Sr. ug ang mismong Mayor sa Manay, Davao Oriental, Antero L. Dayanghirang, Jr. ug lain pang mga dinapit nga mga bisita ug mga katawhan sa maong parokya.

Si Bishop Apigo nagkanayon diha sa iyang homiliya, “gawas sa kapistahan nga atong gisaulog karon adunay added flavor nga pagconsagrar sa atong Parish Church nga maoy bunga sa pagkamanggihatagon sa mga katawhan sa Dios. Walay separation of State and Church niining lungsod sa Manay tungod ang panggamhanan ug mga katawhan sa Manay nagkahiusa diha sa pagsuporta alang sa Simbahan.

Hupti ang atong pagtuo sa Dios, ang atong pagtuo maoy nagkahiusa kanato. Daghan ang nagmahal sa atong simbahan busa mapasalamaton ako sa mga tawong naghatag ug tabang. Bisan krisis, ang mga taga Manay manggihatagon ngadto sa simbahan kay nindot kaayo kining balay alampuanan. Padayon sa pagpadilaab sa kalayo sa atong pagtoo ngadto sa Dios.”

Ang maong kalihukan nagmalampuson pinaagi sa pagpaningkamot sa mga lideres sa parokya ug lungsod pinangulohan sa ilang kura paroko, Fr. Albert Silagan, DCM. (Fe B. Samson | Mati SoCCom)