Pundok Banay kalig-on sa katilingban

Gisaulog ang bulan sa Oktubre gigahin alang kang Birhen Maria atong inahan, ang Birhen sa Rosaryo. Ang maong pagpasidungog, usa ka paagi nga nagpadayag nga siya bililhon sa atong kristohanong kinabuhi kay siya usab ang nagdasig kanato sa pagsunod sa kabubut-on ni Hesus.

Timaan sa tim-os nga pagpasidungog kang Birhen Maria gilunsad ang PUNDOK BANAY BIBLE ROSARY. Kini ang hiniusang kalihukan sa kinatibuk-ang parokya ni San Jose Mamumuo sa Sasa, Davao City. Niadtong Oktubre 6 sa alas 6 sa buntag sa Santos nga Misa, nga gisaulog ni Fr. Bong Dublan, Jr., Kura Paroko. Ang Pundok Banay Bible Rosary o PBBR mao ang paghimo sa Rosaryo diha sa matag pamilya nga giapilan sa membro sa Pundok Banay. Pinaagi sa pagpamalandong sa upat ka Misteryo sa Santos nga Rosaryo mapalawom pa ang pag-ila kang Hesus.

Kasamtangan adunay 203 ka mga Tigpasayon sa Pundok Banay ang gitahasan sa pagpahigayon, nga ang matag balay unta masak-an, maampoan, aron unta maangkon ang grasya sa kahiusahan sa matag membro sa pamilya.

Pinaagi niining maong kalihukan makab-ot ang tinuod nga mithi nga katilingbanon, anaa ang panaghiusa, pagtinabangay ug pagsinabtanay sa tibuok katilingban.

Ang pagmugna sa Pundok Banay diha sa GKK usa ka tahas sa mga GKK Servant leaders, ilabina sa Pangulo sa Katilingban, sa tinguha nga maabot kadtong tanang pamilyang nahisakop sa maong katilingban, mga banay, maabli ang iyang kaugalingon, bation niya nga kabahin siya sa usa ka pamilya sa Ginoo.

Matud pa ni Fr. Bong Dublan, Jr. diha sa iyang homiliya, nga nagkanayon, malisud nga buluhaton apan atong pamalandungan ang lamdang sa ebanghelyo. Ang tinuod nga buhat imong gihalad sa Ginoo mahimong malampuson. Apan ang buhat iya sa tawo lamang, malisod pero sa paglitok mo sa ngalan sa Ginoo bisan si Satanas mahadlok niini. Adunay dakong pagsalig sa pulong sa Ginoo, walaon ang mga pagduda sa ngalan sa Ginoo igo na, mabuntog ang daghang kabalaka, mahulipan sa kalipay. Ang pagbuhat sa kabubut-on sa Ginoo ngadto sa mga yano diha sa katilingban malipay ang Ginoo ug ang imong ngalan nahisulat didto sa registry book sa langit.

Kini nga panghitabo sulod sa simbahan gipahigayon usab ang paglunsad ngadto sa mga GKK pagkagabii panahon sa Kasaulugan sa Pulong uban sa mga tigpasayon sa Pundok banay sa tinguha masugdan kini pagkaugma ug hangtod sulod niining bulan sa Oktobre.

Masud-ong nimo ang dagway sa usa ka Tigpasayon sa Pundok Banay (TPB) nga si Nene Bitacura, dili malitok sa mga pulong apan gibati niya nga malipayon siya nga midawat sa Stampa ni Birhen Maria, naghinam-hinam nga masugdan na niya ang maong pag-ampo ngadto sa iyang pundok. (Amelita Desquitado | SJWP SoCCom)