PSL, kabahin sa buhat sa mission sa katilingban

Excerpt from Archbishop Romulo G. Valles’ homily during the Holy Mass of the 53rd KSP & PSL Gathering of the Archdiocese of Davao last November 18, 2018 at University of Immaculate Conception, Bajada, Davao City.

Diha sa gasa sa pagtoo, si Kristo ang haligi, unsay ingon niya? “Ako ang punuan sa ubas, kamo ang mga sanga” siya ang sentro. Through the years, 53 years na ang mga PSL, dako’g kalabutan sa atong kasaysayan sa Davao, kamo ma PSL ug katong mga nangamatay na, inyong gipulihan… Kamo, dili malalis, kabahin kamo sa pag-ugmad, kabahin kamo sa buhat ug misyon nga dili biyaan ang maong pagtoo, huptan, ugmaron, palamboon, palig-onon, palawmon, kabahin kamo niana.

Kung kabahin kamo hantod karon sa pag-umol, pag-uban, pagbantay, pagpalalom, maayo gyud nga mutan-aw kita sa atong kaugalingon… aron ang atong abot, ang epekto, ang dating ninyo sa inyong pagpangalagad, nindut unta, magmabungahon unta, lalom gyud ang agi, makapalig-on gyud sa pagtoo.

Kita natandug sa atong pag-alagad, sa unsang paagi? Unsay tono sa imong pagpangalagad? Miingon ang unang pag-ampo karon, “O amahan sa tanang kaayo, himoa nga magkanunayon kami sa pag-alagad kanimo…”

Kana atong halad, dili kaayo na hingpit, pipila lang… apan si Jesus, hingpit ang iyang halad, tungod kay siya anak sa Diyos. Naapil ta sa iyang pagkahingpit kay ang porma ni Jesus, sama kanato. He represented us. Busa, sa usa ka Pari, usa ka Relihiyoso, usa ka PSL; walay labut sa dating nato sa katilingban, ang diri sa sulod sa atong kasing-kasing. Unsa kahay grado nato? Kanang atong halad, duol duol ba kana kang Jesus? Ang atong score, taas ba na? mao na’y kanunay nga hagit sa PSL, musugot tag sa dili, mao gyud na ang sentro sa atong pagka epektibo; nga kita maghimo og mga pag-ampo sa katilingban, ang atong sulod, ang atong kasing-kasing sama kang Kristo, perfect unta ang atong score, taas unta ang atong score.

Sa ebanghelyo karon, miingon si Jesus, “ayaw og kalimot, magun-ob man ang langit ug ang yuta apan ang akong pulong magpabilin nga buhi, magpabilin nga kusgan ug magpabilin nga epektibo ang akong pulong…” “Kasaulugan sa pulong”, way labut sa atong paambitan, sa atong walihan, sa atong kinabuhi ba, nagtoo ba ta sa giingon ni Jesus karon? “…ang akong pulong constant nga maghatag kaninyog kinabuhi.”

…pagkanindut nga opportunity sa usa ka PSL nga magdumala sa kasaulugan sa pulong kay in the first place, mura kag mapugos to get in touch sa pulong… unsay effect niini sa akong kinabuhi?

…Kalipay, ambisyon nga magmalipayon kita… malipayon kita diha sa pag-alagad, malipayon kita nga musidlak kita sama sa mga bitoon kay nakakabig kita’g daghan pahiduol sa Diyos. Kining opurtunidad nga kanunay kitang ginapahinumduman nga muhalad kita sa atong kaugalingon, 100%.

Dako akong pasalamat sa buhat sa mission, salamat sa original nga mga PSL sa Archdiocese of Davao. Salamat kaninyo nga anaa karon. Mag ampo kita sa dugang kalipay ug kusog nga maghalad sa atong kaugalingon alang sa atong mga katilingban. Mag-ampo kita uban sa pulong sa Diyos, nga first and foremost before ang maong pulong iwali ug ipasabut sa uban, musulod unta ug mulambo sa sulod sa atong kasing-kasing.