Katekista sa nagkadaiyang parokya sa Diocese gihulma alang sa katawhan sa Dios

Nagmugna og tulunghaan ug nagdawat sa mga katawhan gikan sa nagkadaiyang parokya ang Diocese sa Digos nga gipanguluhan ni Most Rev. Guillermo Afable, DD uban sa iyang kaparian, faculty ug staff aron sa paglambo sa kaalam ug mahimong kaabag sa pagsangyaw. Diin ang Parish staff, katekista, ug mga boluntaryong layko nagpadayon nga nagtuon sa Diocesan Catechetical Formation Center sa Doña Aurora St., Digos City, Probinsya sa Davao del Sur.

Ubos sa maong programa ang duha ka tuig nga pormasyon sa pagkuha sa Missio Canonica aron inig molampos sa maong programa mamahimong otorisado ug aprobado sa obispo ang ilang pagpanudlo sa mga pagtulun-an sa Simbahan.

Ang maong Aktibidad gitawag ug Certificate of Christian Formation and Pastoral Ministry (CCFPM). Sa kasamtangan adunay 21 ka studyante ang padayung nagtuon ug naa sa ikaupat na nga batch. Ang ilang schedule sa klase ginahimo sa unang Semana sa Bulan.

Nagsugod ang maong programa niadtong Hunyo 2012, sa wala pa kini nga nahimong CCFPM gitawag kini nga Certificate in Teaching Religion (CeTRe). Giusab niining tuig tungod dili lang limitado ang pormasyon sa pagpanudlo mahitungod sa Katekismo, lakip nga tumong mao ang malangkubon nga pormasyon sa pastoral workers. Samtang sa DADITAMA sub-region kon Davao, Digos, Tagum ug Mati nga mga Dyosesis, ang Diocese sa Digos pa lang ang anaa niining maong programa. Sa pagpangalagad diha sa parokya mamahimo silang kaabag sa kaparian alang sa pormasyon sa katawhan sa Dios. (Eugene O. Sarga | SUGID)