Kabataan giporma alang sa kaugalingon, katilingban ug Labaw’ng Makagagahom

Nagpahigayon sa pormasyon alang sa mga kabataan sa matag Gagmayng Kristohanong Katilingban kon GKK ang Parish Youth Formation Team sa St. Joseph The Worker Parish, Santa Cruz, Davao del Sur. Ang maong pormasyon gitawag nga “BAHANDI KA” nga nagkahulugan Batan-on Halad Ngadto sa Diyos ug sa Katilingban. Gihimo ang maong pormasyon sumala sa panginahanglan sa kabataan diha sa matag GKK.

Niadtong Nobyembre 11, 2018 gipahigayon ang maong aktibidad sa GKK San Vicente Ferrer ug GKK San Pedro nga nahimutang sa Sitio Tuban, Barangay Zone 6 sa Maong Lunsod nga gisalmotan sa mokabat kapin 40 ka mga kabataan.

Buot mapaabot niining pormasyon ngadto sa mga batan-on ang kamatuoran nga aduna silay mga nagkadaiyang hiyas, dignidad ug katakos nga gikan sa Diyos, ug aduna silay matampo alang sa kaayuhan sa katilingban nga ila kining madiskrubrehan diha sa ilang kaugalingon ug mapuy-an nila ang ilang pagkabahandi gikan sa Diyos ug sa katilingban.

Samtang gibahin sa makatulo ang nahisgutan nga pormasyon, ang unang bahin mao ang “AKO” tumong niini nga matabangan ang kabataan sa pag-ila sa kaugalingon pinaagi sa paghatag kanila sa higayonan nga mahatagan ug hulagway ug mas mapalawman nila ang pagsabot sa ilang kaugalingon.

Ang ikaduha nga bahin mao ang gitituluhan nga “AKO UG ANG DIOS” nga tumong nga matabangan ang kabataan nga mas mapalawman ang pagkaila sa kaugalingon ug makita, mahatagan og bili ang ilang pagkagasa gikan sa Dios.

Samtang ang katapusan nga bahin mao ang “AKO, ANG DIOS, UG ANG KATILINGBAN” katuyuan niini mao nga matabangan sila nga maka-amgo sa ilang pagkagasa dili lamang sa ilang kaugalingon apan lakip na ang ubang tao nga anaa diha sa ilang katilingban.

Kabahin sa maong aktibidad nagmugna sila ug mga kalihukan nga makatabang sa paghugpong sa kabataan diha sa katilingban ug ila kining gipirmahan diha sa altar isip pagpamatuod nga hugut bakos sila nga makig-alayon sa kalihukan alang sa paglambo. (Mark Anthony Lonzaga)