Kabataan gi-awhag sa pagpakaylap sa ebanghelisasyon

Nahimong nalingaw ang mokabat sa 1,300 ka mga kabataan gikan sa nagkadaiyang parokya sa Diocese sa Digos sa gipahigayong 25th Diocesan Youth Convention niadtong Oct. 26 hantod Oct. 28 niining tuig sa Santa Teresa de Avila Vicariate sa Malalag, Davao del Sur uban sa Tema “Filipino Youth in Mission: Beloved, Gifted, Empowered.”

Niadtong unang adlaw pa lamang sa aktibidad mihatag na sa ilang kooperasyon ang kabataan, gikan sa pagpaminaw sa mga talk sa mga nagkadaiyang dinapit nga bisita ingon man ngadto na sa ilang pagsayaw nga daw samag walay mga bukog apan ang tanan nahisubay alang sa Ginoo.

Ang maong aktibidad gitapos sa pormal nga pag-abli sa Tuig sa mga kabataan nga gipangunahan mismo sa Diocesan Youth Director nga si Rev. Fr. Kristian Peter Dorilag, DCD pinaagi sa pagsindi sa torch nga nahimong timailhan nga pormal na kini nga gilunsad.

Sumala ni Fr. Dorilag nga ang kabataan nahimong blue print sa kaugmaon, sumala pa nga mas mayo nga isilsil sa kasing-kasing ug huna-huna sa tanan, batan-on man o ngadto na sa mga hamtong nga ang kabataan nga anaa sa nagkadaiyang lugar, usa ka gasa gikan sa Labawng Makagagahom, mamahimo kini nga makahatag ug maayo nga panig-ingnan sa uban, busa nanghinaot siya dili kini mahisalaag sa dautang dalan.

“Busa sa tanan paningkamotan nato nga maumol ang kabataan, makatabang sab sa ilang kinabuhi isip magtutuo ni Kristo,” sigun ni Fr. Dorilag.

Samtang nanghinaot ang maong pari ngadto sa kabataan nga mamahimo sila nga aktibo sa pagsalmot sa aktibidad alang sa pagpakaylap sa ebanghelisasyon, “hinaot nga ang kabataan mohatag sa oras ug higayon sa pagpakaylap sa ebanghelisasyon, usa ka paagi nga kristohanon nga pagpabilin nga batan-on, pabilin nga maunongon sa Ginoo sa pagpakaylap sa gingharian dinhi sa Kalibutan,” dugang sa Pari.

Apan adunay dakong hangyo ang maong pari ngadto na sa mga hamtong alang sa kabataan. “Sa dili na batan-on hinaot nga mosuporta kamo sa paghatag ug panahon ug paggiya sa kabataan ingon man paghatag sa maayong pagtulun-an,” dugang butyag ni Fr. Dorilag.

Samtang aminado siya nga adunay dakong hagit diha sa kabataan busa siya mibutyag nga kung mahimo, giyahan ang kabataan sa bag-o nga paagi apan dili wagtangon ang mga mando ni Kristo.

Samtang subay sa nahisgutang Convention kinasing-kasing nga gidawat sa St. John Paul II Sub-Parish sa Inawayan Santa Cruz, Davao del Sur ang sunod nga panagtigom sa mga kabataan sa tibuok Diocese karong umaabot nga 2020.