Community Journalism Seminar-Workshop Nagmalampuson

Hilabihang kalipay ang nabati sa Diocesan Commisssion on Social Communications sa Diocese of Digos sa nagmalampusong Community Journalism Seminar-Workshop nga gipahigayon niadtong Nobyembre 3, 2018 sa St. Mary’s Academy sa Sta. Cruz nga gisalmutan sa 18 ka mga kabatan-onan nga gikan sa St. John Paul II SubParish, Rogationist Academy ug mga magtutudlo ug estudyante sa St. Mary’s Academy. Ang maong kalihukan gipangulohan mismo nila Doc Manilee Araune, Ms. Blaze Cantaros ug Sir Bien Abanos nga tigdumala sa Sugid. Uban usab kanila ang bisita gikan sa Davao Catholic Herald nga si Sir Frances Fuentes.

Ang sentro sa maong workshop mao ang pag-agni sa mga kabataan sa pag-apil ug mamahimong kabahin sa Social Communications kon SocCom sa Diyoses sa Digos. Unang gihisgutan sa maong seminar ang Inter Mirifica nga gitudlo ni Doc Manilee. Iyang gipasabot nga adunay responsibilidad ang simbahan ilabina ang mga miyembro niini sa paggamit sa “Social Media” aron pagpakaylap sa Maayong Balita sa Simbahan. Dugang pa nga gipasabot ni Doc Manilee ang responsible nga paggamit sa nagkadaiyang media platforms para makapalambo sa Katolikanhong pagtuo.

Gisundan kini sa pagpasabot ni Sir Bien Abanos sa Etiko sa pagsulat ug pag interview. Iya usab gisaysay ang kinabuhi sa usa ka personahe nga naa sa media. Dugang gipasabot niya nga importante ang oras, ang pagtambong sa mga kalihukan nga mag-una ang media. Ug ang mga tawag sa oras sa serbisyo sulod sa 7 ka adlaw ug 24 oras.

Sa maong adlawa gitudluan usab ang mga kabataan sa pagbuhat ug “article” sama sa “Editorial, Feature ug News Writing”. Gipahimo ug mga artikulo ang mga partisipante mahitungod sa mga isyu sa social media. Nahimuot kayo ang mga partisipante sa dihang gitudluan sila ni Sir RJ de la Cruz kung unsa ang mga pamaagi sa pagkuha ug mga hulagway gikan sa nagkadaiyang anggulo. Ang mga ehemplo nga mismong kuha sa camera ni Sir RJ nakadasig sa matag usa nga mamahimong sama niya. Nadugangan ang kadasig sa dihang mitudlo pud si Sir Julius Paner kung unsaon ang paghimo ug mga captions sa mga larawan nga gikuha. Nakat-unan sa matag usa kung unsaon paghimo ug mga “news in photos” kon “chronicle”.

Gitapos ang maong seminar sa paghatag ug mga “certificates” ngadto sa mga kabataan uban sa hagit nga mamahimong kabahin isip mga bag-ong magsisibya sa Sugid: Diocese of Digos. Malipayong nahuman ang seminar sa pagkuha ug mga groupies ug selfies. (Glenn Miculob | SUGID SocCom)