Aduna bay nabag-o sa atong panaw?

“Katambayayong sa Kaparian ug Relihiyoso sa pagsangyaw kang Cristo” ang tema nga napili sa pagsaulog sa ilang ika-53 ka Anibersaryo sa mga sakop sa Pangulo sa Liturhiya ug Kasaulogan sa Pulong. Gisaulog kini didto sa University of the Immaculate Conception Gym didto sa Bajada. Ang nagpasabot sa ilang tema nga napili mao si Fr. Marbendear Morallas, diin iyang gipalawoman ang tumong sa 40 ka tuig nga panaw sa mga Israelitas didto sa Ehypto, nga alang kaniya, sama da usab sa panaw nga gi-again sa mga sakop sa PSL ug KSP ning atong Arsidiyosis. Matud pa niya ang labaw nga tumong nga mao ang kabubut-on sa Dios mao ang ilang pagpakabalaan. Pinaagi sa napulo ka sugo sa Dios nga gihatag niya kang Moises, gilatid sa Dios ang ilang giya aron nga sila mabalaan. Uban niining sugo sa Dios mao usab ang daghang mga bendisyon ug grasya nga gipaulan ngadto kanila.

Ang ikaduhang punto sa gisaysay ni Father Marbendear mao ang ilang misyon, isip mga PSL ug KSP, nga mao ang pagtubag sa pangutana: “Natandog ba kita sa atong pagpangalagad og sa atong pagpakighimamat sa Pulong sa Dios nga sa kanunay ilang ikauban sa pag-pangalagad diha sa ilang mga kasaukogan ug pag-alagad sa Simbahan o sa Parokya. Aduna ba kini epekto sa ilang kinabuhi? Mahisama kaha kita sa mga bitoon nga mosidlak tungod kay nakadala kita sa uban ngadto kang Cristo? Labaw sa tanan, nagmalipayon ba kita sa atong pag-alagad sa katawhan alang kang Cristo?

Ang panghitabo didto sa UIC Gym, giapilan sa mokabat sa 2,560 ka mga sakop sa PSL og KSP. Nga gikan sa mga 39 ka mga GKK-kapilya.

Labaw sa tanan, ang panagtagbo, gikoronahan sa maanindot nga kasaulogan sa Santos nga Misa nga gipanguluhan sa atong halangdon nga Arsobispo Romulo Valles, DD, ang president sa Catholic Bishop Conference of the Philippines, kinsa mipalawom ra usab sa mga gisaysay ni Fr. Marbendear mahitungod sa kaanindot sa pagtuo sa mga Filipino ilabina sa Mindanao nga adunay daghang mga GKK nga nagmalamboon.

Ang nag-organizar niining panagtagbo sa ilang anibersaryo mao si Fr. Joel Caasi nga mao ang Spiritual Director sa Archdiocesan Liturgical Center, inabagan ni Cipriano Gemosas J. nga mao ang ilang Archdiocesan Coordinator. (Sr. Rica Dalaguit, FSP)