1st Class nga Relic sa Santo anaa sa Diocese sa Digos

Nahikurat ang kadaghanan sa mga mitambong sa alas otso sa buntag nga misa niadtong Oct. 22, 2018 sa ika-upat nga kapistahan sa St. John Paul II Sub-Parish sa inawayan Santa Cruz, Davao del Sur, tungod sa gikabutyag sa obispo sa Diocese sa Digos nga si Bishop Guillermo Afable, DD atol sa iyang homiliya nga mao ra kini ang simbahan nga anaa ang 1st Class relic sa ilang patron.

Diin way lipod-lipod nga giangkon sa obispo nga anaa sa maong Sub-Parish ang kabahin sa dugo sa patron nga si St. John Paul II.

Apan mas nakapahikurat sa tanan sa dihang midugang sa pagbutyag ang Obispo nga aduna diay kalambigitan ang kanhing Santo Papa nga karon nahimong Santo sa Simbahan ngadto sa mga magtotoo sa Diocese, diin mao kini ang nagtukod sa Diocese sa Digos niadtong tuig 1979 nga misiak sa Archdiocese sa Davao, mao usab kini ang nagtudlo sa unang obispo sa Diocese nga si Bishop Generoso Camiña, DD gani mao usab kini ang nagtudlo kaniya nga mahimong obispo ug ang pagbutang kaniya nga madestino dinhi sa maong Diocese.

“Busa motuo ta kang St. John Paul II tungod nagtuo siya nato, mamahino ba diay nga tukuron ta niya unya iya tang pasagdan? Interesado siya kanato,” dugang sa Obispo.

Samtang ang mga Rogationist Fathers nga maoy nagdumala sa maong sub-parish gihimo ang tanan ingon man gipaniguro ang tanang mga resikitos ug papeles aron hingpit na kini nga ideklara nga parokya sa dili madugay nga panahon.