Taliwala sa nagkalain lain nga gigikanan, panaghiusa ang pangandoy sa taga Balut Island

Baynte uno na ka tuig human nahimugso ang Santa Teresita Del Niño Jesus Parish sa Mabilang, Sarangani Island, Davao Occidental (Balut Island). Niadtong October 01, 2018 giasaulig sa parokya ang kapistahan uban sa Tema: Santa Teresita, nag-uban diha sa malahutayong pakiglambigit sa maampoong Misyon sa Simbahan.

Alas 9 sa buntag adunay misa nga gipahigayon nga gipanguluhan ni Rev. Fr. Ronald Lunas, DCD mao ang Vicar for the Clergy sa Diocese sa Digos ug mi konselebrar ang Vocation Director nga si Rev. Fr. Kristian Peter Edwyn Dorilag, DCD lakip na ang kura paroko nga si Rev. Fr. Saturnino Andoy, DCD.

Nasayran nga ang maong isla dili lang mga Pilipino ang mga residente sa lugar, tungod aduna na say mga Indonesian tungod kasikbit na niini ang nasud Indonesia, sumala pa nga 3 ka oras lamang ang byahe sa banka maabot naka sa Maruri Island nga sakop sa nasod Indonesia.

30 porsyento nga mga residente sa lugar mga Muslim, 50 ang mga Protestant Christians ug 20 porsyento mga Katoliko.

Samtang ang Parish Pastoral Council President nga si Mr. Lotgardo Masin, nag-awhag sa mga parokyano nga padayonon ang pagka manggihatagun taliwala sa krisis nga ilang gi-atubang niadtong miaging tuig aron mahuman na ang ilang construction sa ilang gipangandoy nga bag-o ug mas dako nga parokya apan wala pa kini mahuman tungod sa ilang nasugatan nga pagsuway, nahibaloan nga 7 ka buwan ang ilang pag-antus sa grabeng hulaw kon init, nihit na ang bunga sa ilang mga lubi, diin 80 porsyento sa mga residente mga nag-uuma sa lubi, apan niining tuig wala na ang grabeng init mibunga na ang mga lubi, apan ni barato na sab ang presyo niini, apan positibo siya nga sa ilang pagtinabangay ila nang mahuman ang maong proyekto diin kung sud-ongon sa pagkakaron, mga haligi pa lamang ang ilang napundar.

Samtang nahibaloan gikan sa kura paroko nga niadtong Septyembre 30, 2018 kon bisperas sa fiesta aduna silay gihimo nga Walk with Saint Therese aron dugang pundo sa pagpahimo sa parokya, apan nakalakip na niini ang pag-ampo sa kalinaw taliwala sa ilang nagkadaiyang nasyonalidad, tribu, tradisyon, batasan, panginabuhian, pulitika ug pagtoo anaa gihapon ang ilang panaghiusa ingon man ila sab nga gipangamuyo nga ilayo sila sa katalagman.