Sulat Pastoral: Bahin sa debosyon sa Mary Mediatrix Ngadto sa mga magtotoo sa Diyosesis sa Digos

“tumana ninyo bisan unsa ang iyang isulti kaninyo” (Jn. 2:5)

Mga binati kong kaigsoonan diha sa kasingkasing ni Jesus ug ni Maria:

VIVA MARIA VIVA JESUS!

Sukad pa niadtong Aug 22, 1951, kitang mga taga habagatang Dabaw, ilabi na dinhi sa Digos, nagsaulog na sa kapistahan sa atong mahal nga Inahang Birheng Maria, ubos sa iyang pangalan, Mary Mediatrix of all Grace. 67 na ka tuig ang milabay.

Ang kànhing Obispo nato si Msgr. Clovis Thibault, PME DD, maoy nagpasiugda niining debosyon dinhi kanato. Matud pa sa pamatuod ni Fr. Maurice Leveille, PME kura paroko niadtong panahona, ang maong debosyon gipahigayon, bunga sa gitoohan nga pagpakita sa Mahal nga Birhen didto sa Lipa, Batangas sa tuig 1948. Apan, gihukman sa usa ka komisyon sa mga Pilipinong mga Obispo nga walay ebidensiya sa langitnon o diosnong sukaranan sa maong mga hitabo. Bisan pa niini, gipadayon gihapon ni Bishop Thibault ang pagtugot sa debosyon sa Mediatrix ug ang katukuran sa atong parokya sa Digos.

Pagpadayon ug pagpakaylap sa debosyon
Dili pa lamang dugay ang Komisyon sa Doktrina sa Pagtoo sa mga kaobispohan sa Pilipinas, pinanguluhan ni Cardinal Orlando Quevedo, OMI. DD, (CBCP July 7, 2018) naghatg og dugang katin-awan bahin sa debosyon sa Mediatrix. Buot nako usab tagaan og dugang katin-awan ang maong debosyon dinhi sa atoa.

1. Aduna nay debosyon sa Mary Mediatrix sulod sa Simbahan kaniadto pa nga wala pa ang giingon nga “apparition” sa Birhen Maria sa Lipa, Batangas sa 1948.
2. Bisan og walay deklarasyon ang Simbahan nga langitnon o diosnon ang mga panghitabo didto sa Lipa, WALA GIDILI o gipahunong SA SIMBAHAN ANG DEBOSYON SA MEDIATRIX.

Confraternity of Mary Mediatrix of all Grace
Busa, ipadayon ang pàgpakaylap sa debosyon sa Mary Mediatrix of all Grace. Ang Confraternity of Mary Mediatrix of all Grace, nga gitukod nako dinhi sa Digos niadtong 2006, maoy manguna sa pagpahigayon niining debosyon uban sa lainlain hut-ong sa Simbahan gikan sa nga kabataan hangtod sa mga katigulangan. Ang ubang mga kapungang Marianhon gimandoan ug gidasig usab nga motabang niining mgaong katuyuan. Ipaila ug higugmaon natong tanan ang Mediatrix diha sa atong panaw sa pagtoo dinhi sa Davao – Digos – Tagum – Mati.

Ang Imahen sa Mediatrix
Ang imahen o statuwa sa Mediatrix sa Lipa, wala usab gidili nga gamiton sa atong pagdebosyon. Walay diperensya ang maong imahen. Labaw nang dili tinuod nga giyawa-an kini, sama sa gipanulti sa pipila ka mga magtotoo. Wala gikondenar, ni gipalubong, ni gipataguan sa Simbahan ang maong imahen. Gawasnon ang mga magtotoo nga gamiton gihapon kini o og lain nga imahen.

Ang atong Katedral sa Digos, Mary Mediatrix of all Grace Cathedral maoy sentro sa debosyon sa Mediatrix dinhi sa atong Diyosesis. Gisaulog ang iyang kapistahan sa Agosto 22, nga mao usab ang kapistahn sa pagka Rayna ni Maria. Sukad pa sa 1951, gipasidungan na ang iyang imahen nga gipahiluna sulod gayod sa Katedral.

Kasaulogan sa kapistahan sa Mary Mediatrix
Isip prinsipal nga simbahan sa Diyosesis, isipon sa tanang magtotoo sa tanang parokya sa Diyosesis nga ilang ilhon ug higugmaon usab ang Birheng Maria sa iyang pagpataliwala, ug saulugon ang iyang kapisthan sa matag Agosto 22, isip kapistahan sa tanan alang sa Mediatrix dinhi sa atong diyosesis. Tungod niini, gimandoan usab nako ang tanang kaparian sulod sa Diyosesis sa Digos, nga sa matag tuig sa Agosto 22 saulogon ang Misa sa Mediatrix isip obligatoryong Memorial.

Panawduaw ngadto sa Katedral sa Mary Mediatrix
Gidapit ug giawhag ang tanang magtotoo ug deboto sa Mary Mediatrix sa paghimog panawduaw sa ilang pamilya, kapunungan, parokya, eskwelahan sa Katedral sa Mary Mediatrix sa Digos, aron labi pang maila siya ug mahigugma, ug masunod ang iyang kamatoohon ug kamahigugmaon sa Dios labaw sa tanan. Ang mga kabataan ug batan-on labi pa untang makaila ug makasabot sa kabililhon sa maong pagdebosyon.

Ngadto kang Jesus pinaagi ni Maria
Angayan ug makatarunganon nga mahinumduman nato nga ang atong mahal nga Inhan Birheng Maria maoy pinaka paspas, pinakadali ug pinakasiguradong dalan paingon sa atong Ginoong JesuKristo. Ang atong Ginoong Jesus mao lamang ang hingpit ug tinuod nga Tigpataliwala. Ang atong Inahan Birheng Maria duyog lamang ug ubos sa pagpataliwala ni Jesus.

Busa, hinumduman nato ang giingon sa atong Inahan didto sa kasal sa Kana, “ tumana ninyo bisan unsa ang iyang isulti kaninyo” (Jn. 2:5). Sa katapusan, ang pagtuman sa kabubut-on sa Ginoo maoy labing maayo ug mahinungdanon. Kini ang gitinguha ug gipaningkamotan sa atong Inahan Birheng Maria alang kanatong iyang mga anak, kaniadto, karon ug sa gihapon.

Manghimaot ako sa inyong masinugtanong pagtagad niining mga pahinumdum, pahimangno ug pag-awhag. Panalanginan unta kamo kanunay uban sa inyong mga minahal sa kinabuhi.

Inyong kauban sa panaw sa pagtoo ug misyon,

Guillermo D. Afable, DD
Obispo sa Digos
Agosto 13, 2018