SUGID Team mibisita sa Balut Island

Mao kini ang “chronicle” sa among pagbisita sa Parokya ni Sta. Teresita del Niño Jesus niadtong Oktobre 1, 2018 ngadto sa isla sa Balut (Davao Occ).

Tungod kay hunas, gibana banaang kinse ka metros ang among gibaktas padulong sa Bangka tungod kay dili makadunggo sa baybay ang Bangka. Makita sa hulagway si Fr. Bong Lunas nga gitabangan pagpasaka aron makasakay sa bangka. Makita usab nga ang mitabang kaniya, anaa na sa hawakan ang tubig sa dagat.

Alas singko sa kadlawon nilawig kami gikan sa Balangonan, Jose Abad Santos padulong sa isla sa Balut nga nahimutang sa kinatumyang bahin sa Davao Occidental. Kapin usa ka oras namong gitagamtam ang kanindot sa kadagatan ug ang pagsubang sa adlaw sukwahi sa akong nadungog nga hapakon kami sa dagkong mga balud nga daw balay kadagko. Dugang pa nga gisugat kami sa mga dolphin nga daw nag welcome kanamo.

Mao kini ang 21 anyos nga parokya sa Sta. Teresita del Niño Jesus nga nahimutang sa Mabila, Saranggani, Davao Occidental (Balut Island).

Ang pagbasa sa Ebanghelyo ni Rev. Fr. Kristian Peter Edwin DCD.

Sa Homiliya gihisgutan ni Fr. Ronald Lunas ang mahitungod sa pangandoy kontra sa paglaom. Iyang gipasabot nga ang pangandoy tawhanon. Kini ang pagbuhat sa kung unsay gusto sa tawo alang kanimo. Samtang ang paglaum Diosnon, kini ang pagbuhat sa kabubut-on sa Diyos.

Gikahimut-an ni Rev. Fr. Ronald Lunas ang duha ka gagmayng altar servers nga 4 ka anyos ug 5 ka anyos.

JUNTRA: kini usa ka Indonesian nga sayaw nga nadala sa isla ug nahimong usa ka tradisyon nila sa pakighiusa, timailhan sa pagmaya. Dili kini mawala sa matag okasyon sa Balut Island.