Sto. Rosario GKK Pista Gisaulog

Ang mga molupyo sa El Rio Vista Phase 1 & 2 nagsaulog sa ika-26 nga kapistahan sa Sto. Rosario niadtong Oktubre 7, 2018. Ang maong GKK sakop sa 32 ka kapilya sa Assumption Parish, F. Torres St., Davao City nga nahimutang duol sa Bishop’s Residence. Kini mao ang unang pistang gisaulog sa bag-ong natukod ug napadak-an nga kapilya human giguba ang daan. Hayag ang color niini nga lahi sa kasagarang pintal sa mga GKK chapels. Apan ang nakahatag ug dakong pagtagad mao ang salamin nga bongbong sa altar nga lapos (see through) sa mga naglinyang punuan sa kahoy nga gitanom sa likod. Inspired by St. Francis of Assisi ang disenyo nga dili lang makahatag ug preskong hangin apan makapahinuklog kanato sa maanindot ug madagayaong kinaiyahan nga gipiyal kanato sa Labaw’ng Makagagahom aron atong ampingan ug atimanon. Sumala pa ni Bro. Nitoy Lipumano sa iyang programa sa radio gitawag kita sa pagka “misyonerong piniyalan” nga atong amumahon ang kinaiyahan aron kita mabulahan lakip na ang umaabot nga henerasyon.

Ang maong chapel nagdungaw sa Davao River nga kung mobaha mohatag ug dakong kadaut sa mga silingang katilingban sama sa GKK sa San Antonio de Padua ug San Isidro Labrador – Alonso nga nabanlas sa mga naunang baha. Ang maong kadaut nasubli niadtong December 22, 2017 nga misulod sa San Nicolas Chapel taas nga tubig/lapok ug sa mga kabalayan sa El Rio Phase 4-B ug Phase 5. Apan ang mga kaguol nahupay gihapon tungod sa suportang moral, materyal ug ispiritwal gikan sa mga pribado ug publikong sektor uban sa mga GKKs sa parokya.

Sumala ni Fr. Hermie Garcia, SSS, kura paroko nga mass presider sa blessing nga gipahigayon niadtong May 6, 2018 nga silang mga pari moabot ug mohawa kay mabalhin sa laing lugar apan ang simbahan mahibilin sa mga parukyano. Iyang gipasabot nga ang katawhan mao usab ang “simbahan” nga maoy sumusunod ni Kristo sa pagpakaylap sa mensahe sa ebanghilyo pinaagi sa witnessing nga makapadani dili lamang sa kaugalingong pamilya apan labi na gayud sa ubang membro sa katilingban. Kini mao ang kinauyukang kaakuhan sa mga konsagradong katawhan dili lamang sa mga kaparian ug relihiyoso nga maoy gipasabot sa “Year of the Clergy and Consecrated Persons.”

Nagpasalamat usab ang kura paroko sa pagtampo sa 5 ka GKK sa ilang panahon, katakos ug bahandi (time, talent and treasure) sa Zone 9 nga naglangkob sa San Isidro Labrador-Alonso (pista sa May 17), St. Peter Julian Eymard (Aug. 2), San Nicolas de Tolentino (Sept. 10), San Lorenzo Ruiz (Sept. 28) ug Sto. Rosario (Oct. 7). Giapil usab niya ang inisyatiba sa pag-usab sa chapel pinaagi sa El Rio Vista Homeowners Association- Phase 1 & 2 nga gipanguluhan ni Dr. Teresa Bacayo ug sa hinabang pinansyal sa mga manggihatagong katawhan sa kumunidad.

Lakbit kasayuran nga ang Sunday mass nga gisaulog sa sona nagikan pa kang Fr. Frankie delos Reyes, kura paroko sa milabayng katuigan. Nalipay ug nagpasalamat ang mga residente kay duol na kaayo ang misa kanila kaysa moadto pa sa parokya labi na sa panahon sa Misa de Gallo nga nihit ang sakyanan sa kadlawon kay ting-ulan kining panahona. Karon maglakaw lang sila sayo sa buntag paingon sa kapilya kay ang misa alas 8:00 hangtud alas 9:00 ug alternate ang English ug Cebuano nga misa matag Domingo, asa ka pa, maka exercise na ug maka daginot pa sa pamasahe. So if Moses can’t go to the mountain, then bring the mountain to Moses. Agree? (Carolina G. Carumba | Assumption Parish)