Programa sa parokyano alang sa kapistahan sa parokya

“Bisan unsa kataas sa prosesyon, balik ta sa simbahan, atong patron matinod-anon, apan kita usahay dili makahimo.”

Mao kini ang tipik sa homiliya sa Vicars For Religious sa Diocese sa Digos nga si Rev. Fr. Santos Villahermosa, DCD atol sa misa alas 9 sa buntag nga gipahigayon sa Saint Michael parish, Padada Davao del Sur, atol sa ika-65 nga kapistahan sa parokya niadtong Septyembre 29, 2018. Ang maong parokya kasamtangang gidumalaan ni Rev. Fr. Jupiter Canoy, DCD.

Gi-awhag ni Fr. Villahermosa ang katawhan nga lig-onon ang pagtoo, ilabina nga aduna kini tema: “Nagbag-o nga alagad alang sa bag-ong ebanghelisasyon.”

Samtang nahibaloan nga sa wala pa giasulig ang kapistahan, adunay nagkadaiyang programa alang sa mga parokyano, niadtong Septyembre 20, 2018 adunay gihimong skills training nga gitambungan sa 30 ka Pangulo sa Alagad gikan sa GKK diin ilang gitun-an ang paghimo sa Haplas.

Niadtong Septyembre 22 nakig-alayon ang parokya ngadto sa Philippine Sports Commission nga gipanguluhan ni Chairman Butch Ramirez, 300 ka mga bata nga nag-edad sa 8 hantod 12 anyos ang misalmot nga gikan sa 65 ka GKK. Ilang giduwa atol sa maong programa ang Larong Pinoy, sama sa Kadang Kadang, Maria went to town, Sack race ug tubig tubig, aron masinati sab nila ang mga dula nga kabilin ilabina kung unsa ang mga gihimo sa mga batang 90s.

Niadtong Septyembre 23, alas 10 sa buntag adunay gihimo nga feeding program alang sa 300 ka mga bata gikan sa Zona 3, pagkahapon usab 200 ka mga bata ang nakabenipisyo sa feeding program gikan sa Zone 4.

Samtang niadtong 26, ang mga parokyano ilabina mga kababaihan gitudloan sa Parish Social Action Ministry President nga si Marlene Albasite ang pagbuhat sa Fabric Conditioner ug ang ilang kaalam magamit nila kini aron aduna silay income, ilabina sa ilang tagsa tagsa ka Gagmayng Kristohanong Katilingban, aron kung adunay gikinahanglan diha sa ilang Kapilya, aduna silay magamit.