Obispo sa Diocese sa Digos nag-awhag nga dili pasagdan ang pamilya, badlungon ang dili maayo nga batasan

Gi-awhag sa Obispo sa Diocese sa Digos nga si Bishop Guillermo Afable, DD ang mga parokyano sa St. Francis of Assisi Mission Station sa Banate, Malungon, Sarangani Province atol sa ika-18 nga kapistahan niadtong Oktubre 04, 2018 nga dili pasagdan ang pamilya uban sa tema sa kapistahan “Diosnong Kabalaan, Kaalam ug Kalipay, Subay sa Mithi ni San Francisco de Asis.”

Sumala sa Obispo nga aduna may pamilya nga nagkalagyo sa nagkadaiyang lugar, kung dili mahuptan mas maayo nga iampo ug dili gayod pasagdan tungod kung mahimo kini nga panuway, magresulta sa magdala ug buwisit sa kinabuhi ingon man sa pamilya.

Dugang pa nga ang mahal nga Birhen sa Fatima naghatag ug nindot nga hinagiban aron pagpanalipod ug makigkumbate sa yawa, mao kini ang pag-ampo sa Rosaryo matag adlaw.

Apan sumala pa nga mas maayo ang tibook banay mag-ampo sa kanunay, sama sa naandan kaniadtong panahon nga magkahiusa ang myembro sa pamilya sa pag-ampo, apan sa pagkakaron subo na nga pamalandungon nga nabiyaan na kini tungod nalingaw na sa daghang butang, sama sa bisyo, telebisyon, internet ug uban pa busa dili ika tingala nga nagkabungkag ang daghang pamilya.

Midugang ang obispo nga angayang bawion pagbalik ngadto sa Dios ang panimalay aron ang Labawng Makagagahom na maoy maghari sa niini, sumala pa ibalik ang pakigbisog pinaagi sa pag-ampo ug pagsalikway sa yawa sa tanang higayon pinaagi sa pulong, huna-huna ug buhat, sumala pa mas maayo nga mobalik sa pagpamadlong sa pamilya mahitungod sa dili maayong pamatasan.

“Mobalik kitag pamadlong, dili ingon panaway, ayaw iapil ang mga tao sa uban, imohang sakop badlonga, bisag dili mo-tuo pero labing minus maka dungog sila ug balik-balik, ang ilang binuhatan dili maayo, pagpamakak ang ilang pagpangawat, ang dili maayo nga batasan badlonga,” sigun sa Obispo.

Samtang mi-awhag sab si Bishop Afable ngadto sa katawhan nga iapil pagbadlong ang mga pari ug ang obispo kung adunay dili maayo nga binuhatan, kung dili mabadlong ang nagahimo sa dili maayo nagtuo nga tama ang ilang binuhatan, apan siya mi hangyo nga ang pagbadlong himoon sa Kristohanon nga paagi.