Lig-on nga Pagtuo uban sa Parokya

Gidasig sa Vocation Director sa Diocese sa Digos nga si Rev. Father Kristian Peter Edwyn Dorilag, DCD ang mga parokyano sa San Lorenzo Ruiz Parish, Don Marcelino Davao Occidental, atol sa ika-24 nga kapistahan niadtong Septyembre 28, 2018 nga magpabiling lig-on ug puy-an ang pagtoo taliwala sa mga pagsulay nga gisagubang.

Alas sais sa buntag gipangulohan ni Fr. Dorilag ang misa nga mikonselebrar si Rev. Fr. Richard Laquinon, DCD ang assistant Parish Priest sa Santo Rosario Parish, Malita Davao Occidental, ug anaa sab mismo ang kura paroko nga si Rev. Fr. Rogellio Albite, DCD.

Sumala ni Fr. Dorilag nga maayo nga himoong ehemplo diha sa pagtoo ang patron nga si San Lorenzo nga bisan ang kamatayon nga maoy gisilot kaniya ug sa iyang mga kaubanan gikan sa mga Hapon tungod sa iyang pagtuong Kristiano ug pagka Katoliko, wala niya kini biyae, nagpabiling lig-on ang iyang pagtuo taliwala sa mga latus nga iyang naangkon.

Samtang nahibaloan gikan sa Kura paroko nga ang parokya nahimong kabahin sa kinabuhi sa katawhan sa Don Marcelino, ingon man kabahin gayud kini sa ilang paglambo sa pagtoo.

Sumala pa nga mismo ang desenyo sa parokya, adunay kalambigitan sa kinabuhi sa mga lumad sa lugar, ilabina nga ang anaa sa atop mismo, desenyo sa Agong nga kabahin sa tradisyon sa mga lumad, aduna sab kini desenyo sa bangka nagsimbolo sa mga mangingisda sa lugar, ingon man mismo ang Krus nga anaa sa ibabaw nga bahin sa simbahan, nahimong giya sa mga mangingisda tungod aduna kini suga, nga nagsimbolong giya nila diha sa paglawig sa kadagatan, ilabina nga dili sila masaag kung magdaot ang lakat sa panahon.

Samtang atol sa programang Ambit GN, alas 7 sa buntag, live nato nga nahinabi ang kura paroko kauban si Annie Libres sa programang Ambit GN sa DXGN 89.9 Spirit FM ug siya mibutyag nga kaniadto ang parokya adunay mga tanom nga kamunggay, aron inig uli gikan sa misa adunay madala nga gulay ang mga parokyano.

“Human sa misa, ingnan nako sila nga naay kamunggay dire, hala pagdala mo sa inyong balay aron naa moy sabawon, wala sab damha nga inig ka taud taud, naa say maghatud ug isda,” sigun ni Fr. Albite.