Lehyonaryo kabahin sa bag-ong ebanghelisasyon

“Matag Lehyonaryo Tigmantala sa Ebanghelyo Kauban ni Maria”

Mao kini ang nahimong tema sa 60th anniversary sa Legion of Mary, 3rd Diocesan Congress niadtong Oct. 20, 2018 sa Fatima Formation Center, Rizal Avenue, Digos City, Davao Del Sur.

Atol sa aktibidad nahimong emosyonal nga mihatag sa panamilit si Retired Judge Rosalina Montejo isip Vice President sa maong pundok.

Niadtong tungura gatusan nga mga Lehyonaryo ang nagkatapok gikan sa nagkadaiyang dapit sa Diocese sa Digos, alang sa ilang anibersaryo nga gitambungan pa sa Obispo nga si Bishop Guillermo Afable, DD.

Kansang mitulo gayod ang luha ni Retired Judge Montejo tungod sa iyang pagbiya sa pagserbisyo isip Vice President, apan siya mipasabot nga alang kini sa kaayuhan sa ilang pundok.

“Ang pagserbisyo mao ra unta ni akong kalipay, pero unsaon taman, unta inyo akong iampo nga maayo nako sa akong sakit,” sigun sa Kanhing Huwes.

Sumala pa nga dili gayud unta siya moundang sa pagserbisyo apan niining mga gutlua aduna siyay balatian, makaduha ka beses matag semana siya ipasailalom sa Dialysis didto sa Dakbayan sa Davao, gani gibawalan na siya sa Doctor nga magsige ug biyahe, hinungdan nga dili na siya makatambong sa panagtapok matagbulan.

“Nagsugod ko sa pagserbisyo 1968 pa, nahimo kong presidente ug vice sa maong katuigan, gusto pa jud nako nga moserbisyo. Apan karon nakadesisyon ko nga magpahulay usa kay tungod sa akong balatian, unya ang papel sa Vice President maoy mobasa sa attendance sa meeting ug uban pa, unsaon nalang kung dili aktibo ang Vice President,” dugang niya.

Mibutyag siya nga tungod sa iyang sakit dili lamang ang pagserbisyo sa Legion of Mary ang naapektuhan, lakip na ang iyang pagtudlo sa Subject nga Political Science sa St. Francis Xavier College Seminary, College of Philosophy, Catalunan Grande Davao City.

“Nagtudlo pako atong Hunyo, pero pagka Hulyo giatake nako, maong wala nako maka tudlo,” sumala niya.

Mibutyag sab siya nga maningkamot pa siya nga mamahimong baskog aron dili niya mabiyaan ang iyang apostolado sa paghatag ug libreng konsultasyon ngadto sa mga kabus alang sa mga nagkadaiyang kaso.

“Pag naay magpakonsulta nga pobre, libre pero kung dato doble ang bayad, di ko mangayo sa pobre kay looy,” dugang ni Retired Judge Montejo.

Sumala sa nakaylap nga impormasyon gikan kang Sr. Ma. Sofia Aldimita, ADM ang Spiritual Director sa Legion of Mary sa Diocese sa Digos nga ang papel sa mga Lehyonaryo mao ang pagbisita sa mga katilingban, ilabi na pagduaw sa mga masakitun, pagtabang sa ilang spirituhanon nga panginahanglan.

Dugang pa nga dako kini sila nga kabahin sa mapadayunon nga misyon sa simbahan alang sa bag-ong Ebanghelisasyon.