Kapistahan gidagsang sa bisita

Gatusan nga mga parokyano sa Santo Rosario Parish, Malita Davao Occidental ang miuban sa prosesyon alas 7 sa gabii niadtong Oktubre 06, 2018 alang sa pagrosaryo nga gipangulohan mismo sa kura paroko nga si Rev. Fr. Kim Cossid, DCD ug ang assistant Parish Priest nga si Rev. Fr. Richard Laquinon, DCD nga milibot ang aktibidad sa poblacion sa Malita.

Ang maong aktibidad kabahin sa ika-71 nga kapistahan sa parokya niadtong Oktubre 07, 2018 subay sa tema “Birhen Maria Sumbahan sa pagpangalagad alang sa bag-ong Ebanghelisasyon”.

Atol sa kapistahan, midagsang ang katawhan nga naggikan pa sa nagkadaiyang dapit sa nasod.

Diin alas nuwebe y medya sa buntag adunay misa nga gipangulohan ni Bishop Guillermo Afable, DD kinsa nagtuki sa kamahinungdanon sa pagrosaryo ug ingon man ang kamahinungdanon sa pamilya.

“Diha sa relasyon sa babae ug lalaki, espesyal kaayo kini, subay usab ang kabubut-on sa Dios, nga pinaagi niini nga relasyon, maoy magsalamin sa katim-os ug kahingpitan sa kahiusahan sa Dios ug sa tao, ang panagtiayon iya sa Dios dili sa tao,” butyag sa Obispo.