Aksyon sa Dios diha sa kaminyoon

Ika-27 nga Dominggo sa Ordinaryong Panahon
Genesis 2:18-24 / Hebreo 2: 9-11 / Markos 10:2-16 o Markos 10:2-12

Ang pagtulun-an nga gisangyaw ni Jesus sa atong Ebanghelyo karong Dominggoha labing masabtan sa nagpaluyong kamatuoran sa Iyang dakong kaluoy o pagtagad sa mga gagmay o kanang wala ilha sa katilingban nga mahinungdanon, ilabina ang mga babaye sa ilang panahon. Ang mga babaye wala ilha nga adunay bili tungod kay sa diha nga sila magminyo, magsalig na sila sa ilang bana aron mabuhi ug mapanalipdan. Sa laing pagkasulti, kon sila bulagan, wala na siyay pamilya nga kadaganan, kay dili na siya makabalik sa pamilya sa iyang ginikanan. Kinahanglan nga mangita dayon siya og kadangpan, kay sa ingon mag-inusara na siya sa kalibutan diin siya abandonado ug usahay gani nahimong butang nga abusahon sa mga tawo, kay wala na siyay bili.

Alang kang Jesus, ang mga babaye, sama sa mga lalaki, labing bililhon sa mga mata sa Dios, ilabina tungod kay sila anaa sa delikado ug mahuyang luna sa katilingban. Labaw sa tanan gimugna sa Dios ang lalaki ug ang babaye sa sinugdanan pa lamang aron mamahimong partners, magkauban ug magkahiusang magtinabangay ug suporta.

Mao kini ang nakalimtan sa mga minyo nga sila naghiusa sa Dios dili lamang tungod sa ilang nahiusang pagsinugtanay sa usag-usa apan labaw sa tanan tungod sa aksyon sa Dios. Ang mahiusahong aksyon sa Dios, nga nagtahod sa tawhanong kagawasan, mao ang makapabugkos kanila ug kini mahimo lamang epektibo kon ang tawo dili mobabag sa grasya sa Dios. Ang Dios matinud-anon kaayo sa iyang saad nga makig-uban sa tanang mga minyo ug nahibalo kon unsay panginahanglan sa matag usa kanila. Kon ang minyo ug magpakitabang kaniya kay siya man ang ikatulong bahin o party diha sa kaminyoon, matabangan gayud sila. Sa pagkatinuod, ang Dios, mao ang bugkos nga naghigot sa duha ka nilalang; Siya mao ang taming, ang sagang batok sa mga pagsulay ug mga puwersa sa demonyo nga buot moguba sa ilang kaminyoon. Ang kaminyoon, makit-an nga anaa sa krisis karon, apan kini nga krisis mao usab ang hinungdan nga adunay moalagad alang sa kabag-ohan. Hinaut nga ang Espiritu mobag-o sa nawong sa kaminyoon. (Sr. Rica Dalaguit, FsP)