Tara! Magtapok Ta! Parish Youth Ministry Assembly

“TARA! MAGTAPOK TA!” Mao kini ang panawagan sa Core Group sa Parish Youth Ministry (PYM) sa St. Mary of the Perpetual Rosary Parish alang sa mga Pangulo sa Batan-on (PSB) sa nagkalain-laing PYM Organizations ug Gagmay’ng Kristohanong Katilingban (GKK) nga nahisakop sa maong Parokya. Gipahigayon ang maong panagtapok kon Parish Youth Ministry Assembly kaniadtong Hulyo 22, 2018 sa Shrine of Our Lady of the Most Holy Rosary.

Ang mga tumong sa maong panagtapok kon Assembliya sa mga batan-on mao kining mosunod:

1. Aron maabi-abi ug makaila sa mga PSB si Rev. Fr. Rey T. Sabuero, ang Spiritual Director sa Parish Youth Ministry;
2. Aron makit-an kon aduna bay mga PSB ang matag GKK ug PYM Organizations;
3. Aron magka-ilhanay ug makatukod og relasyon ang mga PSB sa matag GKK ug PYM Organizations;
4. Aron mabalik ug mapasiga ang commitment sa matag PSB sa pagserbisyo diha sa GKK ug Parokya.

Ang maong panagtapok gitambongan sa nobenta y cuatro (94) ka mga batan-on sa mga nagkadaiyang PYM Organizations sama sa Mass Servers, St. Mary Youth Choir, Youth for Christ, St. Mary Scholars, St. Mary Assistance Rescue Team ug mga representante sa Ministry sa Batan-on sa Siyam ka Zona sa GKKs. Madasigon nga ni-participar ang mga batan-on sa mga nagkalain-laing aktibidades diin gisugdan kini sa Team Building sa alas otso sa buntag. Ang maong kalihukan gipangulohan sa Core Group sa San Miguel Parish Youth Ministry, Panacan. Pinaagi niini nasukod ang kahiusahan, kalig-on, ug pasensya sa mga batan-on bisan pa sa kainit sa adlaw. Nakat-onan sa matag usa ang kinaiya sama sa pagpaminaw, pagsalig, pagtinabangay, maayong pakig storya sa kauban diha sa ministriya ug ang pagdawat sa responsibilidad. Gihuman ang buntag nga aktibidades pinaagi sa Solidarity Lunch.

Gipadayon ang Assembliya sa hapon pinaagi sa input ni Rev. Fr. Rey T. Sabuero, isip PYM Spiritual Director. Gipaambit ni Fr. Rey sa mga batan-on ang mahitungod sa “Servanthood”. Gipasabot ni Fr. Rey kung unsa ang Servanthood. Isip mga Servant unsay tahas sa matag usa diha sa mga organizations ug katilingban diin sila nahisakop. Gihuman ang usa ka adlaw nga assembliya sa mga batan-on pinaagi sa Santos nga Misa sa alas cinco y medya sa hapon diin gipangulohan ni Rev. Fr. Rey T. Sabuero. Sulod sa Santos nga Misa opisyal nga gi-send forth ug gipanalanginan sa Kura Paroko, Rev. Fr. Dionisio C. Tabiliran ang mga Parish Youth Ministry core group ug mga PSB coordinator sa matag GKK nga malampuson nga nakahuman sa Parish Youth Ministry Assembly aron sa pagpadayon sa pag-alagad ngadto sa tagsa-tagsa nila ka mga GKK ug sa Parokya.

Malipayon ug mapasalamaton ang Parish Youth Ministry Coordinator nga si Jonalen Asares tungod sa kalampusan sa maong assembliya ug sa suporta sa PYM Spiritual Director nga si Rev. Fr. Rey T. Sabuero. Nanghinaut ang Parochial Vicar, Rev. Fr. Rey T. Sabuero nga pinaagi sa maong mga kalihukan nakapadasig sa mga batan-on sa St. Mary of the Perpetual Rosary Parish nga tiunay na mo-alagad sa Ginoo, ug ilabina sa suporta sa Kura Paroko, Rev. Fr. Dionisio C. Tabiliran nga nanghinaut usab na ipadayon kining mga aktibidades aron molambo ang Ministriya sa Batan-on nga bisan ginagmay basta kanunay. (Justine Villanueva, Media Committee Head | Photos by Hermie Mapute, SMPRP SoCCom)