Panagtapok sa mga Staff sa parokya gihimo aron sa paglambo

Gipahigayon niadtong Agosto 27, 2018 ang panagtigum sa mga Parish staff ug mga kaparian ubos sa pagdumala sa Archdiocese sa Davao.

Ang maong aktibidad gihimo sa Holy Cross of Davao College, Santa Ana Avenue ning syudad.

Sumala sa gipamahayag sa atong exklusibo nga pakighinabi kang Bishop George Rimando, DD, ang Auxillary Bishop sa Archdiocese sa Davao, nga ang maong panagtapok gihimo aron mahatod kanila kung unsa ang mga pamalandong nga unod sa Redbook, ilabina nga naghisgot kini sa Pito ka Sacramento sa Pagtulun-an.

Mihatag sa overview niini mao si Rev. Fr. Junar Dela Victoria, DCD. Dugang ni Bishop Rimando nga aron usab madungog ang sugyot ug obserbasyon sa kaparian ug mga layko diha sa pagdumala sa Parokya, ingon man mas maayo nga ma han-ay ang pag-abi-abi ug ang nindot nga batasan diha sa pag-alagad.

Dugang sa gihimo nga panagtapok ang pag-ilhanay sa mga parish staff ug workers ingon man magkalambigitay sa usa’g usa.

“Si Archbishop Romulo Valles ni-awhag sa atong mga staff sa pagpadayon, ilabina nga sumala ni Papa Francisco nga magma-abi-abihon kita sa pagtagad sa atong mga paryokyano ug parokyana,” sigun ni Bishop George.

Midugang ang maong Obispo nga dakong importante nga nagkahimamat ang mga parish staff ilabina nga 18 na katuig ang milabay ang katapusan nilang panagtapok, butang nga mas maayo nga hisgutan ang mga butang nga nakatabang ug wala nakatabang diha sa ilang pagpangalagad.

Samtang siya midugang nga isip Kura Paroko sa San Pablo Parish nga nahimutang sa Juna Subdivision, Matina ning syudad sa Davao ginahimo na nila ang mga lakang aron nga maabi-abi nila sa sakto ang mga parokyano, ingon man lima na katuig na nila nga ginahimo ang regular meeting matag buwan ingon man ang kanunay nga paghimo sa team building, aron kung aduna may nahimong sayop diha sa serbisyo, dili na kini masubli, ug aron mas mo-uswag pa ang ilang relasyon sa matag-usa.