Mga misyonero nga nabiktima sa kawat, nagpadayon sa pagsangyaw

Bisan pa man nabiktima sa pagpangawat ang mga Marist Fathers sa Matti District Catholic Center sa Matti, Digos City, Davao del Sur niadtong tuig 2014 nagpadayon gihapon sila sa pagsangyaw sa pulong sa Labawng Makagagahom ingon man ang pagdala sa balaang ngalan ni Maria sa maong lugar.

Sumala sa nahimo nga pamahayag ni Fr. Christopher Thadeos Ganzon, Marist kinsa mao ang administrator sa MDCC, nga mikabat sa 500,000 ang nadagit sa wala pa maila nga suspetsado niadtong kinalasang buwan sa tuig 2014 diin ang vault sa sulod sa ilang kumbento gidala na sa suspetsado sa gawas nga bahin, ug gikuha ang salapi.

Ilabina nga ang maong kantidad gikan sa gasa sa katawhan alang sa pagpatukod sa ilang gipangandoy nga simbahan.

Apan sa dihang gipahibalo na sa katawhan, wala sila magdahom nga nahimo na hinoon sila nga manggihatagon niadtong higayona, butang nga dako sab nila nga pagpasalamat nga wala nawagtang ang salig kanila sa mga parokyano.

Sumala pa nga sa hinay hinay nakabalik sila sa pagkatigum sa maong kantidad, ug aduna sab silay napalit nga luna alang sa pagatukuran sa maong simbahan.

“Dala na sa mga gidonate, mga naa na sa 1.2 ektarya ang yuta tanan,” sigun ni Fr. Ganzon.

Samtang niadtong Septyembre 12, 2018, ilang gisaulog ang pista pasalamat sa balaang ngalan ni Maria alang sa ika-unom nga tuig nila nga anaa sa maong lugar isip magsasangyaw, inubanan sa tema “Saulugon ang balaang ngalan ni Maria nga malipayon, isip mga nabag-ong alagad-pangulo sa bag-ong Ebanghelisasyon.”

Alas 9 sa buntag adunay gipahigayon nga misa nga gipangulohan ni Rev. Fr. Santos “Sonny” Villahermosa, DCD, mao ang Parish Priest sa Immaculate Conception Parish, Kiblawan, Davao del Sur ug mao usab ang Vicar for religious sa Diocese sa Digos.

Si Fr. Villahermosa nag-awhag sa mga magtotoong katoliko nga mas maayo nga mas palambuon ang pagtuo ug dili dayon mahuyang sa mga kakulian diha sa pagpangalagad.