MATAMIS sa 30 ka tuig

Gisaulog sa Diocese sa Digos niadtong Septyembre otso 2018 ang ika-30 ka tuig sa kasumaran sa pagkahimugso sa Malita Tagakaulo Mission sa Demoloc, Malita, Davao Occidental.

Uban sa tema nga “MATAMIS: Paganengeng aw pasalamat… padelegen aw ubunan” (Pahinumdom ug pagpasalamat… Ipadayon ug amumahon) ang maong misyon gisugdan ni Fr. Gille Bilanger, PME kaabag sila si Sr. Ely Relacion, MIC ug layko nga si Elsa Albaracin ug Lucia Sejas.

Sumala ni Fr. Belanger nga gikalipay niya nga nahimong nagmabungahon ang iyang nahimong misyon nga gisugdan 30 na ka tuig ang milabay, ang pagsangyaw sa pulong sa Dios.

Miangkon ang maong pari nga niadtong unsa siyang mi-abot sa maong dapit daghan siyang mga suliran nga giatubang, ilabina ang pagkat-on una sa mga pinulungan sa mga Tagakaulo, busa dakong panahon iyang gigahin aron masayod sa ilang local nga lenguwahe alang sa komunikasyon.

Lakip nga gitagaan ug dakong panahon ni Fr. Belanger ang paghubad sa tanang mga basahon ingon man teksto sa simbahan, diha pa lamang daan sa mga gamit sa bunyag iya kining gihubad, aron masabtan gayod sa mga kaigsoonang Tagakaulo.

“Ang pari magdala sa Dios ngadto sa katawhan ug ang katawhan dal-on ngadto sa Dios.”

Sumala pa nga mobaktas siya sa kabukiran usa ka oras ngadto na sa unom ka oras sa katilingban nga iyang gisangyawan.

Dugang pa nga gihimo niya ang pagsangyaw kang Jesus, apan iyang gipaningkamotan nga ipabilin ang tradisyon sa mga Tagakaulo, gikan pinulungan ngadto na sa ilang sinootan.

“Gidala namo ang pulong sa Dios apan wala lang diha kutob, mitabang sab kami sa panguma, edukasyon ug sa panlawas,” sumala ni Fr. Belanger.

Samtang mibiya si Fr. Belanger sa maong lugar tuig 2011 ug ang mihulip kaniya sa samtangan mao sila Fr. Joey Evangelista ug Fr. Primo Fagel, Jr. nga gikan sa kongregasyon sa Missionaries of Jesus.

Samtang ang maong mission station aduna na kini 43 ka mga Gagmayng Kristohanong Katilingban.