Mass Servers’ Investiture

Atol niining bulan sa pagsaulog sa bokasyon sa Arkdiyosis sa Davao, gipresentar ni Rev. Fr. Rey T. Sabuero, Parochial Vicar sa St. Mary of the Perpetual Rosary Parish ang cuarenta y cuatro (44) ka mga MASS SERVERS ngadto sa Kura Paroko, Rev. Fr. Dionisio C. Tabiliran ug sa katilingban nga nagkatigom diha sa Santos nga Misa niadtong Dominggo, Septyembre 23, 2018 sa alas 9:30 sa buntag alang sa Investiture kon opisyal nga pagtugyan ug pagsul-ob ug pagpahimutang sa ilang katungdanan ug ilabina ang pagpanalangin kanila sa ilang bag-ong gimbuhaton isip Mass Servers diha Parokya ug sa ilang Katilingban diin sila nahisakop.

Sa maong Investiture hugot nga gidawat sa mga Mass Servers ang kanunay nilang pagtuman diha sa ilang bag-ong katungdanan ug ilabina ang pagdawat ni Laurence Sison isip pangulo sa maong ministriya alang sa kalamboan sa ilang pag-pangalagad sa parokya ug sa Gagmay’ng Kristohanong Katilingban (GKK).

Ang maong mga kabataan nakahimo na sa gikinahanglang pormasyon sama sa seminar-workshop ug recollection diin nakita nga sila angayan ug takus sa maong pagpangalagad isip Mass Servers. Gikahimut-an sa Dios ug sa Simbahan kining mga kabataan nga naghalad sa ilang kaugalingon. Busa, nanghinaut ang Kura Paroko, Fr. Diony Tabiliran ug ang Parochial Vicar, Fr. Rey Sabuero nga unta adunay bisan duha kon tulo niining mga Mass Servers ang magpadayon sa pagka Pari.

Nagmalampuson ang Investiture tungod sa pag-umol sa Parochial Vicar, Fr. Rey Sabuero sa mga Mass Servers ug sa suporta sa Kura Paroko, Fr. Diony Tabiliran ug ilabina sa makanunayong suporta ug pag-atiman sa mga pamilya niining mga kabataan diin malampuson nga nakatambong sa maong Investiture. (Hermie Mapute | SMPRP SoCCom)