LGU kabahin sa pagsaulog sa kapistahan

Mitambong sa misa atol sa ika-67 nga kapistahan sa Mary Madiatrix of All Grace Cathedral, Digos City, Davao del Sur, mismo ang mayor sa syudad ug ang governador sa probinsya nga si Governor Dodo Cagas.

Ang naasoy nga misa gisugdan sa alas 9:30 sa buntag nga gipangulohan ni Catholic Bishops Conference of the Philippines President ug Davao Archbishop Romulo Valles.

Atol sa halad, si Peñas ug Cagas nagkahiusa sa paghatod sa bino. Sumala ni Gov. Cagas sa atong exclusive nga pakighinabi kaniya nga natandog siya sa mensahe ni archbishop Valles atol sa homiliya, ilabina nga angay magmalipay atol sa kapistahan ni Maria tungod dili lang siya inahan ni Jesus apan lakip nga iyang gidawat nga mamahimo siyang inahan sa tanan.

Giangkon sa gobernador nga sa iyang pagpangalagad sa probinsya wala gayod nila mahikalimte ang pagsimba sa Labawngmakagagahom, bisan paman nga adunay nagkadaiyang relihiyon kon denominasyon ang mga empleyado sa probinsya.

“Matag lunes anaa sab mi ecumenism sa probinsya, anaa ang presensya sa nagkadaiyang relihiyon,” butyag sa gobernador.

Samtang atol sa misa ni konsilibrar ni Archbishop Valles ang iyang mga kaklase sa Saint Francis Xavier Regional Major Seminary, Catalunan Grande, Davao City, mao si Bishop Colin Bagaforo, DD, ang obispo sa Diocese sa Kidapawan ug mismong si Bishop Guillermo Afable, DD ang Obispo sa Diocese sa Digos.