“Kita Binunyagan, Gimahal Kita Niya, Bilihon kita”

Sa dakong gugma ug kahinangop nga giduaw siya sa pari, wala siya masayod sa iyang pagabuhaton.

Si Cecilia Cortez, nobentay kuatro (94) anyos ug nga nahisakop sa Immaculate Conception Chapel sa parokya sa San Pedro Cathedral. Usa usab siya ka lumilohok sa Legion of Mary sa cathedral sa iyang kapanahunan.

Gibisita siya ni Rev Fr. Voltaire Dimol, aron makadawat ug sakramento sa Hilog sa Masakiton. Sa dihang nakakumpisal na siya ug nadihugan, nakita sa iyang panagway ang dakong kalipay sa pagdawat sa usa ka bililhong gasa nga gihatag kanato sa Ginoo, gasa nga muhatud kanato sa pagkabalaan ug maghatag kanato sa kaluwasan.

Sa pakighinabi kaniya sa pari, gipangutana siya nganong kinahanglan nato nga modawat sa mga sakramento, sa tumang kalipay siya mitubag, “kita binunyagan ug gimahal sa Dios, bilihon kita kaniya.”

Nakapahinuklog kini kanako, nga kung kita nangalagad bisan pa moabot kita sa taas nga edad, dili mawala sa atong panghunahuna ang mga pulong sa Ginoo, ug mao usab kini ang atong kusog sa pagharung sa mga problema, dili gayud kita pasagdan.

Sama sa iyang saad kanato “ako magauban kaninyo, hangtod sa katapusan sa kalibutan.” (Matthew 28:20) (Rosalinda Jabonillo | SPC Parish SOCCOM)