Katawhan sa Matanao, Davao del Sur, nalingaw sa mga acrobat

Nalingaw ang mga parokyano sa St. Michael Parish, Matanao, Davao del Sur tungod sa gipakitang pasundayag sa RM Cebu Acrobatic Promotion ala una y medya sa hapon ug alas syete kagabii, subay sa ika-55 nga kapistahan sa parokya uban sa Tema “Nabag-o nga alagad Pangulo alang sa Bag-ong Ebanghelisasyon uban sa pangama ni San Miguel.”

Atol sa atong nasaksihan sa nahisgutang pasundayag, nahimong kulba hinam ang hitabo sa mga gipakitang stunt sa atong mga kaigsoonang acrobats tungod sa ilang tambling nga daw walay mga bukog.

Ingon man anaa sab ilang gipakita ang ilang kahanas sa pagbalanse sa lawas, ug ang ilang kahawod sa paglatay ug pagsayaw sa alambre.

Anaa say higayon nga ang mga acrobat nagdula sa basketball samtang sakay sa monocycle, kansang ang tanan nahimong bansay sa paggamit sa matang sa maong butang.

Nasayran pinaagi kang Fr. Tony Sila, DCD, ang parish priest sa maong parokya, nga ang gibayad nga 100 pesos alang sa pagtan-aw sa kalingawan gamiton sa pagpakonkreto sa pader sa parokya nga mokabat sa 50 metros. Sumala pa nga gibana-banaang mokabat sa 300,000 pesos ang salapi nga kinahanglan sa maong proyekto.

Samtang atol sa nahimong misa alas 8 sa buntag nga gipangulohan ni Fr. Rico Dingal, DCD ang Chancellor sa Diocese of Digos ug Parish Priest sa Inahan sa Kanunayng Panabang sa Guihing Hagonoy, Davao del Sur, siya naghagit sa mga parokyano nga mamahimong madasigon kanunay sa kinabuhi, ingon man dili mo-surrender sa tanang pagsulay nga pagasagubangon matag adlaw.

Sumala pa nga ang tanang pag-antos sa kinabuhi maoy magpalig-on sa tao, sa pagpadayon sa paglawig niining kalibutan.

Samtang human sa misa 14 ka mga bata ang midawat sa sacramento sa bunyag.