Kabataang Lumad gusto mohaw-as sa kalisod pinaagi sa pagtuon

“Naa ko diri kay pobre jud mi, lima mi magsoon, ika-upat ko, pero minyo naman akong mga igsoon, para pod makatabang sa ginikanan, skwela jud ko, enjoy man sad diri.”

Mao kana ang pamahayag sa 15 anyos nga si Mariel Tantong, residente sa Sitio Palalidan, Little Baguio, Malita, Davao Occidental.

Usa lamang siya sa 28 ka mga kabataan nga anaa karon sa Community Outreach Program sa Little Baguio, programa sa Canadian nga misyonero nga si Fr. Pierre Samson, PME nga gisugdan niadtong tuig 1995.

Sumala sa saysay ni Anna Marie Igalan, kinsa ang in-charge sa mga kabataan, nga nahimo na sab nga inahan sa mga bata, nga ang scholar sa maong programa mikabat niining tuig sa 60, apan 28 lamang ang anaa mipuyo sa ilang Formation House, ug ang uban anaa sa ilang panimalay apan adunay madawat nga tag 300 pesos matag bulan, aron adunay magamit sa ilang pagtuon.

Mi dugang si Igalan nga nag-edad ang mga kabataan sa 12 hantod 22 anyos, kinsa mga kabos ug nagtuon sa Blaan National High School nga anaa sa maong Barangay.

“Ang uban nila ani mobaklay pa padung sa skwelahan mga isa ka adlaw tungod sa kalayo,” sigun ni Igalan.

Nahibaloan usab nga dili mga magtotoong Katoliko ang pipila kanila, diin aduna say nakadaiyang Christian Denomination ingon man aduna silay nagkadaiyang tribo mao ang Blaan, Tagakaulo ug Manobo apan panahon sa pag-ampo, nagkahiusa silang tanan sa ngalan sa Labawng Makagagahom.

Samtang nasayran nga gawas nga libre ang ilang pagpuyo ug pagtuon, makalakip sa ilang pormasyon ang paghimo sa mga responsibilidad, tungod sila mismo ang moluto sa ilang pagakaonon, anaa sab silay tindahan kinsa sila ra usab ang makapahimulos sa tanang kita niini.

“Naa may mga pagsulay dinhi, pero positibo mi nga ipadayon ang programa, porsigido man sad ang mga bata.”