Ika-24 kapistahan sa Panacan Parish gipangandaman

Mga parokyano ni Señor San Miguel sa Panacan, nagsugod na ug pagpangandam alang sa ika veinticuatro (24) ka tuig nga kapistahan sa umaabot nga Septiyembre 29, 2018.

Dungan niini mao usab ang ika diecisiete (17) ka tuig sa Araw ng Panacan.

Sa milabay nga bulan Agosto 5, 2018 nagpahigayon ug Parish Pastoral Council meeting nga gilangkuban sa nagkadaiyang pundok gikan sa Barangay Council sa Panacan, gipangunahan ni Brgy. Captain Doce L. Apostol, Barangay Official sa Sasa, mga School Heads sakop sa parokya, mga Lideres sa Ministriya ug organisasyon.

Ang meeting gihimo aron malikayan ang conflict sa mga schedules nga himoon sa Parokya ug sa Barangay. Sa meeting gipresentar ang mga schedules ug programa nga ipahigayon sa adlaw sa fiesta. Si kagawad Eller Bantugan sa Brgy. Panacan nagkanayon nga ang Barangay andam ug tagana sa pagtabang sa mga kalihukan sa parokya.

Ingon man usab nagpahayag ug suporta ang Barangay Sasa sumala ni Kagawad Lewel Alunday ug SK Chairman Welce John Ramos. Nagpadayag usab ug dako nga suporta si Engr. Rudy Sultan usa ka negosyante. Nagpasalamat ang Kura Paroko Rev. Fr. Edsel Paloma sa gipakita nga suporta gikan sa duha ka Barangay, mga ministriya ug organisasyon.

Ug sa kasamtangan gisugdan na ang pagtaud sa mga bantings ug mga dekorasyon, ug gipaspasan paghuman ang mga proyekto sama sa renovation sa Function Hall 1 ug Function Hall 2, renovation sa kusina ug receiving area sa parokya. Gipanindot usab ang palibot sa landscaping.

Si Fr. Edsel gayod ang nangunay pagdumala sa mga proyekto ug nangunay sa construction kauban ang mga trabahante. (Ma. Liezl Gilbuena | SMP SoCCom)