‘Gitawag kita sa pagka-mapaubsanon’

Ika-81 nga kapistahan sa patron sa Mati gisaulog

MATI CITY—Isip mga binunyagan, gitawag ang tanan sa pagka-mapaubsanon sama ni San Nicolas de Tolentino.

Kini ang mensahe ni Msgr. Editho Baño, parish administrator sa San Nicolas de Tolentino Cathedral sa Mati sa pagsaulog sa ika-81 nga kapistahan sa parokya, Septyembre 10.

Sa iyang pagpadayag sulod sa misa nga gipangulohan ni Bishop Emeritus Patricio Alo, giingon ni Msgr. Baño nga bisan dili pari o madre, ang mga layko makapakita sa hiyas sa pagkamapaubsanon diha sa adlaw-adlaw nga pagkinabuhi.

Dugang usab niya nga ang pagsangyaw dili lamang sa pagsulti kon dili mahimo usab diha sa buhat.

“Ang garbo maoy mother of all sins,” sumala niya.

Iya usab giingnan ang katawhan nga mitambong sa Misa nga magpalayo sa duha ka klase sa garbo nga mao ang intellectual pride ug spiritual pride.

“Diha sa atong pagkamapaubsanon mapuy-an nato ang hiyas ni San Nicolas de Tolentino,” sumala niya.

Dugang usab ni Msgr. Baño nga ang tawo makahinumdom lang sa Ginoo kung nagkalisod ug makalimot na sa laing higayon.

Samtang sa maong misa gihimo usab ang pagpanalangin sa mga pan nga gi-apud-apud sa katawhan isip paghinumdom kay San Nicolas de Tolentino nga migamit og pan nga gituslo sa tubig aron pag-ayo sa masakiton.