Ang batang si Daryl

Ang kinabuhi sa bata bililhon ug gasa kini alang kanamo nga mga ginikanan.

Si Daryl Jann Hitutua, nisimba siya kay gisaulog niya ang ika-unom niya katuig (6) niadtong adlawa. Nakita namo siya nga nagpahipi sa kilid sa kapilya, gipasulod siya kay nakita nga murag aduna siyay gipangita.

Gipangutana namo siya, “nganong malipayon man ka? Ug kinsa imong gipangita?” Ang iyang tubag, “BIRTHDAY man gud nako karon, ug akong imbitahon si Teacher Item sa among balay.” Si Teacher Item iyang maestra sa kinder. Nagluto daw iyang papa, nangutana mi kung “asa diay imong mama, nga si papa man ang nagluto,” ingon niya “basta lang” sa iyang linghod nga pangisip, makita nga gimingaw siya sa iyang inahan.

Si Fr. Raul Nieves nga maoy nagpahigayon sa Santos nga Misa sa maong Zona atong panahuna, nahimoot siya sa bata ug iyang gisabak, nagdungan kami sa pagpangaon uban ni Teacher Item, nga iyang special nga bisita unta sa ilang balay, apan aron mabati sa bata nga special siya katong adlawa, gi-agda sila sa mga GSL nga didto na sila mangaon ni Daryl Jann uban sa iyang igsoon nga babae. Makita sa nawong sa bata ang tumang kalipay labi pa nga gisabak siya sa pari, sigurado kami nga dili na kato makalimtan sa bata.

Nalipay usab kami, kay nakita namo nga maayo ang pagpadako sa iyang ginikanan. Tungod nga wala siya malimot sa pagsimba ug pagpasalamat nga niabot na usab ang laing gutlo sa iyang kinabuhi diha sa grasya sa Ginoo. (Rosalinda Jabonillo)