Mga hagit sa Pamilya nagkadaghan

Sa panahon karon, adunay mga daghang hagit nga giatubang ang pamilya ilabina sa mga balaod nga mamahimong rason ang mawala ang kabililhoon niini.

Sa pakighinabi sa Director sa Family and Life Apostolate (FLA) nga si Fr. Orlando Angelia, giingon niya nga daghang hagit karon diha sa iyang pagpangalagad sa Family and Life Apostolate, ilabina nga daghang bahad ang giatubang sa matag pamilya, tungod niining balaodnon nga Divorce Bill nga padayong giduso sa mga magbabalaod, sumala pa nga usa kini ka pagbulag sa pamilya, nga dakong supak sa pagtulun-an tungod ang gihiusa sa Dios dili na kini bulagon sa tawo.

Samtang usa sab sa iyang nahisgutan nga bahad, ang planong pagmuntar sa Vendo Machine sa Condom alang sa pampubliko nga lugar sama na lamang sa Sangguniang Panlungsod ning syudad sa Davao, alang sa pagkunhod sa teenage pregnancy.

Sumala pa nga dili kini maong solusyon alang sa nagkabata nga nangabuntis, ang solusyon mismo mao ang pagpangga sa pamilya, pagkat-on sa pamilya nga malambuon ug adunay pagsinabtanay.

Ilabina nga importante nga giyahan usab sa mga ginikanan ang ilang mga anak, aron dili kini makapangita ug butang nga makaguba sa ilang pamilya, kung anaa ang paggiya sa ginikanan, makahimo ang mga kabataan ug desisyon alang sa ilang kaugmaon.

Dili pa lamang dugay gihimo ang 8th General Assembly sa FLA ug Pangulo sa Kristohanong Banay (PSKB) niadtong Hulyo 28 diin gihimo ang pagbalik lantaw sa pagtulun-an sa simbahan pinaagi sa Humanae Vitae nga gisuwat ni Pope Paul VI niadtong Hulyo 25, 1968. Sumala sa maong pari nga nauna na nga pahimangno sa Santo Papa, 50 ka tuig na ang milabay nga kanunay nga mosunod sa balaod sa Dios diha sa kaminyoon, ilabina nga may kalambigitan kini sa Birth Regulation, paggamit sa natural Family Planning, apan daghan ang misupak nga misangpot sa daghan ang pamilya nga nagkabungkag, dugang pa nga ang tumong unta sa Humanae Vitae nga ang pagpuyo sa katawhan diha sa pagkamalipayon subay sa gitudlo sa Dios.