Manna: Balaod ug Kamatuoran sa Kinabuhing Walay Katapusan

Ikanapulo’g Siyam nga Dominggo sa Ordinaryong Panahon
1 Mga Hari 19:4-8 / Efeso 4:30-5:2 / Juan 6:41-51

Mahinungdanon nga atong hinumduman nga ang mga Judeo nagtuo nga ang manna nagsimbolo sa Balaod, nga mao ang kasingkasing sa Napulo ka Sugo sa Dios. Mao kini ang mga gisugo sa Dios sa tanang mga anak pinasikad sa kamatuoran kon kinsa sila ug nganong gimugna sila.

Ang napulo ka sugo mao ang nagtudlo kanato nga mahimong matuod nga tawo diha sa husay sa kabuhatan (I-III: pagtahod sa Dios; IV: pagtahod sa ginikanan; V: pagtahod sa kinabuhi; VI: pagtahod sa kaminyoon ug sexualidad; VII: pagtahod sa kabtangan sa uban; VIII: pagtahod sa reputation sa uban; IX: paghupot sa malinis nga intension diha sa relasyon sa kabtangan sa uban ug sa relasyon; X: paglikay sa kahakog). Ang pagkaon sa manna, sama ra nga mikaon ikaw sa Sugo sa Dios, sa Pulong sa Dios, ang kamatuoran mahitungod sa Dios, mahitungod kanato, mahitungod sa relasyon ngadto kaniya ug sa relasyon ngadto sa isigkatawo.

Alang sa mga naminaw sa panahin ni Jesus ug sa panghunahuna ni Jesus usa ra ang kahulugan sa Balaod. Gipakaon ni Jesus ang ilang panghunahuna ug kasingkasing sa Tinapay sa Iyang Kamatuoran ug Gugma. Apan iya usab kining gipalawom: Ang Dios mismo nahimong Tinapay ug Kamatuoran, ug dili angayang malibog ug pagabulagon. Ang binhi sa walay katapusang kinabuhi nakaturok sulod niini, ug kon kalawaton nato kini nga matinud-anon, ang kinabuhi mosulod ug motubo sulod kanato; kita usab makasulod ug motubo sulod niini.

Mao kana nga ang pagsaulog sa Santos nga Misa, adunay duha ka lamesa: ang lamesa sa Pulong sa Dios, ang Kamatuoran, ang mga Sugo, ug ang lamesa sa Eukaristiya, ang Tinapay, ang Manna. Adunay duha ka mahinungdanong bahin ang Santos nga Misa tungod kay mao kini ang tinuod nga sustansya alang sa kinabuhing walay katapusan.

Sa pagdawat sa Pulong sa Dios, ang matag usa kanato, kon bukas ang atong kasingkasing, bato balani kini ngadto sa kahiusahan sa pagtoo ug pagsabot mahitungod sa mga misteryo ni Kristo ug sa Iyang Simbahan. Ang pagkalawat sa Eukaristiya, kon abli ang atong kasingkasing, ang matag usa kanato mahimong bato balani ngadto sa kahiusahan sa Gugma ug Kagawasan ni Kristo mismo, ang mahimayaong kagawasan sa mga anak sa Dios.

Busa sa atong pagparticipar sa Santos nga Misa mao ang pagpalig-on sa atong pagpuyo sa kahulugan sa Pulong sa Dios ug sa Tinapay. Ang pagpuyo niini nagkahulugan ang pagsaksi sa kamatuoran nga ang makatagbaw sa atong mga gipangandoy nga kinabuhing walay katapusan mao si Kristo. Kini usab nagkahulugan sa pag-antos, kay aron husayon ang personal nga kinabuhi, ang relasyon sa usa’g usa o sa tibuok pamilya og ang katilingban nga atong gipuy-an.