Kinaadman, Eyukaristiya, Kabag-ohan

Ikakawhaan nga Dominggo sulod sa Ordinaryong Panahon
Proverbs 9:1-6 / Psalm 34:2-3, 10-11, 12-13, 14-15 / Ephesians 5:15-20 / John 6:51-58

Monay. Cinnamon bread. Pan de monggo. Star bread. Egg bread. Spanish bread ug uban pa. Kini ang pipila lamang ka mga nagkadaiyang klase sa pan nga atong nahimat-an. Kaniadto sa seminaryo, kining mga nagkadaiyang klase sa pan ang makalipay kanamo matag merienda sa buntag ug sa hapon ilabina kun kini paresan ug bugnaw’ng juice o init nga kape panahon sa tig-ulan. Panahon sa mga taliabot nga exams, kini ang among mga panlaban batok sa kagutom kun kami nagtuon isip pagpangandam sa exams. Mao nga kaming mga seminarista, kalipay ang bati-on kun aduna nay pan ilabina kun kini paga-ambitan sa imong kauban. Kitang mga Pilipino mahilig gayud sa pan nga lami. Adunay mga kasinati-an nato nga mahinumduman samtang kita nagakaon ug pan. Kun pan lamang ang pagahisgutan, dili kumpleto ang painit sa sayong kabuntagon kun wala kining pandesal. Matod pa sa usa ka pari, “it’s (pandesal) typically Filipino.”

Ang atong Ebanghelyo karong Domingo, naghisgot sa Matuod nga Pan. Ang maong Ebanghelyo naghisgot sa pinaka una sa pito ka pulong ni Hesus nga “Ako” (I am statements). Matod pa sa usa ka batid sa pagsabot sa Balaang Kasulatan, ang Juan 6:51-58 naghisgot sa Sakramentuhanong Presensiya (sacramental presence) ni Hesus diha sa pan. Kini mao ang Pan nga naghatag sa kinabuhi, ang Iyang unod ug dugo. Kini ang pan nga dili susama sa gikaon sa mga katigulangan ug unya nangamatay gihapon kay ang mukaon niining pan mabuhi sa dayon (Juan 6:58). Tataw sa Ebanghelyo, si Hesus miingon nga Siya mao ang pan nga gikan sa langit nga naghatag ug kinabuhi (Juan 6:51).

Isip mga sumusunod ni Kristo, unsa man ang kalambigitan niining Pan sa Kinabuhi sa atong inadlaw-adlaw nga pagkinabuhi? Alang sa atong pamalandong, adunay tulo ka punto nga akong ipaambit.

Una. SI HESUS ANG MATUOD NGA KINAADMAN UG ESPIRITU. Sa unang pagbasa kita gipahinumduman ug gidapit sa paghupot sa Matuod nga Kinaadman. “Tambong kamo sa kombira mga tawong walay alamag… Dali kamo, kaon sa giandam kong kalan-on ug inom kamo sa bino nga akong giandam kaninyo” (Panultihon). Kini usab mao ang pahinumdum ni San Pablo ngadto sa mga taga-Efeso, “pagmatgon kamo pag-ayo sa inyong pagkinabuhi. Ayaw kamo pagkinabuhi sama sa mga ignorante kondili sama sa mga maalamon… Ayaw kamo paghuboghubog kay makadaot kini kaninyo; hinonoa tinguhaa ninyo nga mapuno kamo sa Espiritu.”

Kun ato kining itandi sa atong Kristihanong pagtoo, si Hesus, ang Matuod nga Kinaadman ug Espiritu, nagdapit kanato sa paghupot Kaniya ug pag-ambit sa Iyang unod ug dugo. Kini ang Matuod nga Kaalam. Matag kaon nato sa Iyang unod ug dugo, ang kalan-on nga langitnon, diha sa Santos nga Misa, kita nabag-o ug nahatag sa kinabuhi. Wala na kita nagpabilin diha sa kamatayon ug kangitngit sa sala o sa walay pagkaalamag.

Ikaduha. ANG EYUKARISTIYA. Diha sa Eyukaristiya, gihatagan kita ni Hesus ug bag-ong kinabuhi. Wala na kita nagkinabuhi sama sa mga ignorante apan diha sa Kaalam ug Espiritu. Diha sa Eyukaristiya, samtang kita muambit sa unod ug lawas ni Hesus, nahinumduman dili lamang sa atong kaugalingon nga kasinatian apan ilabina ang Kasinatian sa Pagpangluwas kanato sa Ginoo pinaagi kay Kristo. Ang atong mga kasinatian, gihingpit diha kang Hesus. Kita nahatag sa katagbawan niining Pan nga langitnon. Mao nga wala nay laing pan gawas kang Hesus, nga nakahatag kanato sa tunhay nga katagbawan sa atong kauhaw ug kagutom.

Ikatulo. MATUOD NGA KABAG-OHAN. Sa matag kaon nato sa unod ug dugo ni Hesus, nabag-o kita. Apan kining kabag-ohan dili lamang magpabilin diha sa matag usa kanato. Kini unta nga langitnong kalan-on nga atong gidawat diha sa Santos nga Misa, mamahimong kalan-on alang sa uban.

Sa atong inadlaw-adlaw nga pagkinabuhi, sa ginagmay’ng mga butang mamahimo kita nga mga kalan-on o pan alang sa uban nga gigutom ug giuhaw. Sama pananglitan sa atong mga ginagmay’ng pahiyum, pulong pasalamat sa tanang grasya nga nadawat, paggahin sa atong presensiya ug pagpaminaw sa uban nga nanginahanglan ug uban pa. Kining mga simple nga lihok makatabang na kini sa uban aron sila mahiduol sa Matuod nga nagahatag ug katagbawan, si Hesus, diha sa Eyukaristiya.

Niining Ikakawhaan nga Domingo sulod sa Ordinaryong panahon, kita gidapit sa pagkaon sa kalan-on nga langitnon nga mao si Hesus. Aron usab sa matag kaon nato Kaniya, kita nabag-o ug nahatagan ug katagbawan sa atong mga kagutom ug kauhaw. Ug sa ingon nga kita nahatagan sa katagbawan, kita usab mamahimong pan alang sa uban aron sila mahiduol ug makatagamtam sa katagbawan nga si Hesus lamang ang tinuoray nga makahatag. Dalayon ang Dios! (Sem. Michael Ondras, Jr.)