FLA Assembly naghagit sa pag-atiman sa mga sagbot sa kinabuhi

Gisaulog sa Family and Life Apostolate ang ika 8th Archdiocesan Assembly niadtong July 28, Sabado sa tibuok adlaw sa St. John Paul II Pavilion, San Pablo Parish, Juna Subd., Matina, Davao City. Adunay mga pito ka gatos ang nanambong nga mga Core group ug GKK Pangulo sa Kristohanong Banay (PSKB), gikan sa pito ka mga bikaryato. Ang maong selebrasyon gisugdan sa pagpaambit mahitungod sa ‘Revisiting Humanae Vitae in its 50th Year anniversary’ ni Rev. Fr. Orlando A. Angelia, FLA Director ug pagpalawom sa Tema “Pamilya: sukaranan sa Pangulong maalagaron” ni Rev. Fr. Marbendear Morallas, ACLAIM director ug Pastoral Director-REMASE. Ang Santos nga Misa gisaulog ni Bishop George Rimando, D.D. ug giubanan ni Fr. Orly Angelia.

Duyog sa selebrasyon mao usab ang pagbindisyon sa mga magtiayon nga nagsaulog niining tuiga sa ilang ika 25, 40, 50 ug 60 ka tuig sa ilang kristohanong kaminyoon, sila nakadawat sa bendisyon ug recognition sa ilang paglahutay sa ilang relasyon ug pag-atiman sa kabataan.

Matud pa ni Fr. Orly Angelia, nagpadayon nga madaugon ang Simbahan, tungod kay kamo karon nga nia sa akong atubangan nagmatuod niini, daghan gihapon ang nagpabilin nga lig-on, matuohon, mahigugmaon ug manggihatagong ginikanan.

Matud pa sa homiliya ni Bishop George Rimando, “Kining maong panagtigum, pundok sa mga layko nga nagkahiusa sa pagtuman sa atong mga misyon sa pagpakaylap sa maayong balita nga walay makabungkag sa gihiusa sa Ginoo, diha sa Sakramento sa kaminyoon. Diha diay sa atong kinabuhi gilibutan usab kita sa mga sagbot nga sama kanato buot magpakabuhi. Apan sa atong pagkatawhanon buot kitang mosalikway kanila. Apan dili nato kalimtan ang atong sumbanan nga mao ang Sagrada Pamilya ni Hesus, Birhen Maria ug ni San Jose. Lig-onon nato ang dakung pagsalig, kaluoy, paghigugma, pagsabot ug pagpailob, kay makadawat kita sa grasya sa Dios. Ug mihatag siya ug hagit alang sa tanan – Unsa may atong pagbati niining mga sagbot sa parokya ug diha sa atong katilingban?”

Usa ka akto sa kagawasan, nga nagmatuod nga “gidawat ko ang akong igsoon tungod kay mao kana ang iyang kinaiya” bisan pag dagko ang mga kalapasan nga nabuhat niya kanako, sama ra sa Dios nga nagdawat kanatong tanan nga pulos makasasala, sa walay pagpanumbaling sa atong nga sayop, Matud pa ni San Pablo: “Ayaw pagpadaog sa dautan, hinuon, buntoga sa kaayo ang dautan.”

Ang kalihukan sa hapon tutok kini sa pag-inambitay sa mga talento ug pagpaambit sa mga kasinatian sa kinabuhing malipayon ug mga kalampusan sa pipila ka mga magtiayon nga gitahasan niini.

Natapos ang hiniusang pagsaulog dala ang kaamguhan ug mga handumanan nga dili dayon makalimtan. Kini nahitabo tungod usab sa pagpaningkamot sa tanan. Daghang Salamat. (Amie Desquitado, SJWP SoCCom)