Bag-ong kura paroko sa Bunawan, mipahayag sa mga proyekto

Mangingisda nga saksi sa pagbag-o sa nawong ni Hesus, apostoles nga matarong ug magsasangyaw – mao kana si Sr. Santiago Apostol. Siya maoy gipili nga patron sa bag-o pa lamang nagsaulog sa ika-56 nga kapistahan sa parokya sa St. James the Great Apostle, Bunawan niadtong Hulyo 25.

Subay sa tema nga nagkanayon: “Sr. Santiago; lig-ona kami sa pagtubag sa tawag sa pagbag-o og pagkabalaan,” ang misa sa buntag gipangunahan ni Arsobispo Romulo G. Valles, inubanan nila Msgr. Jaime Gamboa, Rev. Fr. Arman Bacalso, Rev. Fr. Elvie Bordios, ug ang bag-ong kura paroko nga si Rev. Fr. Rolando Mandreza, DCD. Sulod sa maong misa, gipahigayon ang installation kang Fr. Mandreza diin siya gibendisyunan sa Arsobispo aron mamahimong magmakanunayon, magmalig-on, ug madasigon nga sumbanan isip amahan sa parokya.

Kabahin sa iyang mga proyekto, giyagyag ni Fr. Mandreza nga nakasabot siya nga “dili siya ug ang iyang parish staff and parish pastoral council makaluwas sa tanang panginahanglan sa katawhan, pero ako inubanan sa mga parokyano magmugna ug mga proyekto nga sama niini: una, ang istruktura nga bahin nga mao ang atong pagtagad sa atong kumbento. Ikaduha, ang pagpalig-on sa pormasyon sa tanang mga lideres sa GKK og sa sentro. Ikatulo, mao ang pagpang awhag ug mga formators aron makadasig sa mga parokyano, ug pagpalahutay sa mga adult og youth choir pinaagi sa mga ipahigayong workshops and seminars.”

Ang parish worker nga mao si Bhing Tabacon nadasig sa bag-ong kura paroko. Siya miingon nga nagmalipayon siya sa bag-ong kura paruko. “Lakip man sa mga milabay nga mga kura paruko, sila ang amahan sa parokya. Si Fr. Lando makiangayon, daling maduolan ug maalagaron sama sa ako nga usa ka katekista,” dugang ni Tabacon.

Si Juliet Canubas, usa ka parokyano nagsulti nga, “mabalik ang pagkamadasigon sa ubang lideres sa GKK sa mga kalihukan nga ipahigayon labina kon ipatawag sa kura paruko sa mga seminars o pormasyon nga iyang pagdumalaan sulod sa 6 ka tuig.” (Ervie Ghen Pelderos | SJP Bunawan)