Abp. Valles nagpahimangno sa mga tahas isip kura paroko

Alas onse sa buntag niadtong Agosto 16, 2018 gipahigayon ang santos nga misa sa San Roque Parish, Barangay Malabog, Paquibato District, Dakbayan sa Davao, nga gipanguluhan ni Catholic Bishops Conference of the Philippines President ug Davao Archbishop Romulo Valles, DD.

Ang maong misa may kalambigitan sa ika-34 nga kapistahan sa parokya ingon man ang installation isip kura paroko nga si Rev. Fr. Arnold Balaquinto, DCD.

Atol sa homiliya sa Arsobispo, hugot gayod niya nga tugon kang Fr. Balaquinto nga ang iyang dakong papel isip kura paroko nga sama sa patron nga nagahimo og mga butang aron ang katawhan mas mahiduol sa Ginoo, ilabina nga sama kang San Roque nga pinaagi sa lihok ang katawhan madasig ug mahimong Diosnon ang tanan, ilabi na nga ang katawhan mamahimong maampoon.

Dugang sa mga tugon sa arsobispo ngadto kaniya nga dapat dili siya malimot sa mando sa Labawng Makagagahum nga siya mag-atiman sa mga ilo, byuda ug mga langyaw tungod sila ang mga katawhan nga makalolooy nga kinahanglan atimanon ilabina nga wala silay lig-on nga baruganan sa katilingban.

Samtang panapos nga tugon ni Archbishop Valles ngadto kang Fr. Balaquinto nga ang usa ka pari angay nga mapasayloon sa isigkaingun aron modelo sa katawhan, ilabina nga ang tugon sa balaang kasulatan nga magpasaylo sa isig ka ingon sa kapituan ug ka pito.

Alas 3 sa hapon sa maong adlaw, live nato nga nahinabi ang naasuy nga kura paroko sa Programang Kwento ng Ordinaryong Tao sa DXGN 89.9 SPIRIT FM kauban si Doc Cheng Vilog, siya miankon nga andam ug tagana siya nga mosunod kung unsa ang nahimong tugon sa arsobipo kaniya isip piniyalan nga mag-atiman diha sa Parokya.