Unang Kapistahan sa Bag-ong GKK

“Inahan sa Kanunay’ng Panabang; Manggihatagon, Maloloy-on ug Puno sa Gugma sa iyang mga Anak”. Mao kini ang tema sa kapistahan sa GKK Inahan sa Kanunay’ng Panabang, sakop sa Our Lady of the Miraculous Medal Parish sa Indangan sa ilang pagsaulog sa unang kapistahan niadtong Hunyo 27, 2018. Ang maong kasaulogan gipahigayon pinaagi sa Santos nga Misa nga gipanguluhan sa kura paroko nga si Rev. Fr. Jess Samaniego. Nagsugod ang maong misa sa alas 9 sa buntag. Matud pa ni Fr. Jess sa iyang homiliya mahitungod kang Birhen Maria, nga ang relasyon nato ngadto sa mahal nga Birhen sama sa relasyon nato sa atong inahan. Dugang pa niya base sa iyang kasinatian nga kung anaa siyay pangayoon sa iyang amahan ipaagi kini niya sa iyang inahan kay sayud siya nga dili gayud siya balibaran sa iyang mama. Sayud usab kita nga si Birhen Maria ang pinakadoul sa kasingkasing ni Jesus tungod kay iyaha kining inahan. Mao man gani nga kung unsa ang atong pangayoon sa Ginoong Jesus, mangayo kita sa panabang ni Birhen Maria tungod kay atoa usab siya nga inahan sa kanunay’ng panabang. “Ang pagka-Inahan ni Maria, hangtod sa hangtod,” matud pa ni Fr. Jess.

Sa katapusang bahin sa iyang homiliya, iyang gihagit ang mga inahan nga nanambong sa maong Misa nga unta huptan ang mga hiyas ni Maria sa iyang pagka-inahan sa katawhan sa tibouk kalibutan. Sa wala pa mihatag si Fr. Jess sa iyang katapusang panalangin panahon sa misa, nagpasalamat siya sa mga GKK Servant Leaders ug sa mga membro niini sa kalampusan sa maong kasaulogan ug mihatag siya ug higayon sa pagtubag sa mga pangutana sa mga nanambong sa misa kay tungod mao usab kini ang unang higayon nga nagmisa siya sa usa ka GKK sukad sa iyang pagkadestino sa maong parokya. Usa sa mga pangutana mao nga kung unsa ang mga kalihukan nga iyang himoon sa parokya ug ang tubag niya nga mag-obserbar una siya sa naandang buluhaton sa parokya ug iyang pang metingon ang membro sa PPC kon Parish Pastoral Council.

Nasayran nga ang maong GKK natukod tungod sa kagustohan ug paningkamot sa mga lumulopyo sa maong lugar. Sila kaniadto mga sakop pa sa GKK Sagrada Pamilya, ug kay layo man ang ilang mga puloy-anan sa luna sa kapilya nagkauyon sila nga mohimo ug bag-ong katilingban nga doul sa ilang mga panimalay. Toud man nakahimo gayud sila ug gibendesyonan ang ilang kapilya sa kanhing kura paroko nga si Fr. Menying niadtong Mayo 23, 2018 mao usab kini ang unang higayon nga gimisahan ang ilang kapilya.

Sa katapusan anaa na gayud silay kapilya sa doul ug lipay kaayo si Nanay Lolita Saraga tungod kay siya man ang nagdonar sa maong luna sa kapilya. Siya usab usa ka Katekista ug Lector sa parokya. Malipayon ang mga GSL ug mga membro sa kalampusan sa ilang kapistahan. (Anabelle Encluna, OLMMP Soccom | Photo by April Balaga)