Plano sa Kura Paroko suportado sa PPC

Malipayon nga gidawat ug suportado sa mga miembro sa Parish Pastoral Council (PPC) sa St. Mary of the Perpetual Rosary Parish, Buhangin ang mga plano o proyekto ug mga gimbuhaton nga buot hatagan og prioridad sa Kura Paroko, Rev. Fr. Dionisio C. Tabiliran ug ang Parochial Vicar, Rev. Fr. Rey T. Sabuero. Mao kini ang resulta sa unang opisyal nga panagtigom sa Parish Pastoral Council niadtong Dominggo, Hulyo 1, 2018 diin gipahigayon sa Formation Ministry Room sa alas 10:30 sa buntag hangtud ala 1:30 sa hapon. Buot ipahigayon sa Kura Paroko, Fr. Diony ang pagbisita ug ang pakighimamat sa mga GKK Servant Leaders ug Miembro sa singkwenta y saiz (56) ka mga Gagmay’ng Kristohanong Katilingban (GKK) nga nahisakop sa Parokya sa St. Mary of the Perpetual Rosary. Nakalatid pud sa iyang plano nga misahan ang mga umaabut nga Pre-Fiesta GKK General Assembly una magsugod ang assembly proper. Ang maong lakang nakapahimout kon nalipay ang mga pangulo ilabina ang mga Pangulo sa Katilingban (PSK) diin pagkahuman sa PPC meeting gi-pahibalo dayon sa PSK ang maong mga plano atol sa PSK formation meeting pagka hapon niadtong Dominggo, Hulyo 1. Aduna pay mga plano nga nakalatid sama sa formation ug renewal sa mga pangulo ug hinay-hinay nga pag improve palibot sa Simbahan.

Gipadayag usab ni Fr. Rey ang gitahas sa iyaha isip Parochial Vicar. Nahisakop sa iyang buluhaton isip Parish Youth Ministry (PYM) Spiritual Director ang mga organizations sa mga batan-on sama sa parish youth ministry, mass servers, lectors and commentators, youth choir, St. Mary scholars, PDART ug uban pang grupo nga adunay kalambigitan ang mga batan-on.

Mabungahon ang unang panagtigom sa kura paroko ug parochial vicar kauban ang mga miembro sa PPC diin ang tanan nanghinaut sa suporta sa matag usa. (Hermie Mapute | SMPRP SoCCom)