Mga katekista sa La Verna gipadala

Ang pagpadala sa mga katekista ug mga formators sa St. Francis of Assisi La Verna aron mosangyaw sa maayong balita gipahigayon niadtong Hulyo 15, 2018 atol sa alas 5:00 sa hapon nga misa sa parokya. Kini gipangulohan sa bag-ong kura paroko nga si Rev. Fr. Pete Lamata.

Adunay 35 nga mitahan sa ilang kaugalingon aron sa pagpakaylap sa maayong balita ngadto sa mga eskwelahan ug mga GKK nga sakop sa maong parokya binuligan sa Espiritu Santo ug sa Mahal nga Birheng Maria. Matud pa ni Fr. Pete Lamata ang maong pagpanumpa ubanan gayod sa usa ka tim-os ug kinasingkasing nga commitment aron molahutay sa iyang buluhaton isip magsasangyaw sa maayong balita.

Isip pagsuporta sa mga membro sa tibuok parokya giawhag ang makanunayong pag-ampo uban sa pangama sa patron nga si St. Francis of Assisi. (Sylvia Gamaya Orbeta, Parish Soccom | Photo by Maria Alma Gumanid)