Lumad Husay Mindanao gilunsad

Gilunsad niadtong Sabado, sa Ateneo De Davao University, ang Lumad Husay Mindanao, mao ang grupo sa 32 ka nagkadaiyang tribu sa mga lumad nga gikan sa nagkadaiyang dapit sa Mindanao, aron ipanawagan ang ilang buot masakab-ot sa kumunidad mao ang kalinaw.

Nahibaloan nga usa pa man namugna ang maong grupo, aduna na kini laing pundok ang mga lumad apan ilang gihiusa aron mas mahimong adunay tingog ang ilang mga panawagan, mao kini ang Lumad Mindanao Peoples Federation, Katawhang Lumad Council of Mindanao Peoples Peace Movement ug Mindanao IP Peace Forum.

Gikabutyag sa bag-ong napili nga Lider sa Lumad Husay Mindanao nga si Timuay Leticio Datuwata gikan sa Tribong Lambangian nga nakabase sa South Upi Maguindanao, nga tumong sa pakighiusa ug ang paglunsad sa ilang Pundok mao ang paghangyo sa gobyerno ug sa National Democratic Front nga adunay representante ang mga lumad kung ang duha ka grupo magpahigayun ug Peace Negotiation.

Sumala sa pagpasabot ni Timuay Datuwata nga kinahanglan nga adunay magdala sa ilang mga mulo ngadto na sa pagtagbo sa NDFP ug Gobyerno aron mapaabot ang ilang mga suliran, ilabina nga kung ang sundalo sa nasod ug ang New Peoples Army magkatagbo ug magkabayloay sa buto sa armas, sila pirmi ang hiabihang apektado.

Samtang usa sa ilang panawagan nga kung aduna nay ipahigayon nga survey ang Department of Agrarian Reform kon DAR, dili ilakip ang ilang yutang kabilin, sumala pa nga nasabtan nila nga adunay pangandoy ang gobyerno nga matagaan ug yuta ang mga kabus apan dili lamang ilakip ang ilang mga yuta gikan sa ilang mga ginikanan mao ang gitawag nga Ancestral Domain.

Dugang pa nga hayag pa sa sidlak sa adlaw diha sa batakang balaod mao ang Republic Act 8371 nga ang mga titulado na nga Ancestral Domain dili na ilakip sa Land Reform Program, apan tataw sab nga adunay bahad karun sa ilang yutang kabilin.