GKK Mass sa Immaculada Concepcion Sasa uban sa bag-ong Kura Paroko sa SMP-Panacan

Malampusong gipatigayon ang Sakramenta sa Eukaristiya o Santos nga Misa dinuyugan sa maayong panahon ang GKK Mass sa Immaculada Concepcion – Km. 12 Sasa. Ug mainitong gidawat sa mga Ministriya ug membro sa GKK ang bag-ong Kura Paroko sa San Miguel Parish – Panacan, niadtong Hulyo 21, 2018 sa 6:25 sa gabii ug natapos sa 7:00 sa maong gabii.

Ang Santos nga Misa gipangunahan sa bag-ong Kura Paroko sa San Miguel Parish-Panacan na si Rev. Fr. Edsel G. Paloma. Ang Ika-limang Kura Paroko sa maong parokya sukad pa niadtong tuig 1994. Kinaiya sa mga Kura Paroko ang pagtigayon ug GKK Mass aron sa paghimamat sa mga ministriya ug membro sa maong parokya diin ilang gipanguluhan. Si Fr. Edsel G. Paloma matud pa niya siya taga Leyte ug sayo misulod sa seminaryo sa edad na 13 anyos ug naordinahan sa edad na 30. Ug niadtong Hunyo 03, 2018 nagsugod siya isip Kura Paroko sa maong parokya.

Diha sa Santos nga misa ang ebanghelyo gikutlo gikan sa Ebanghelyo ni San Mateo – ang Tahas sa Napulog-Duha ka mga Apostoles; ang pagsangyaw sa paghari sa Diyos; ayohon ang mga masakiton; banhawon ang mga minatay; hinlo-an ang mga sanlahon ug abogon ang mga yawa. Ug pahimangno ni Jesus kanila dili mangayo ug mudawat ug bayad. Ug dili magdala’g kwarta o bulawan, plata o bronsi, ilisan, sapatos ug tungkod. Ang mensahe sa maong ebanghelyo matud pa niya, ang tahas o misyon sa napulo’g duha ka Apostoles ni Kristo misyon usab nato isip mga binunyagan. Ang pagsangyaw sa pulong sa Dios ug ato kining puy-an sa paagi; una magmakanunayon ug magmatinud-anon pagpangalagad; ikaduha ang paglikay sa mga tawo nga dili moabi-abi o modawat.

Diha sa iyang paghomeliya ang mga membro sa maong GKK, adunay managlahing komento ug panghunahuna. Adunay nagsulti maayo ug dasig “dili ka bation ug duka” ug maundanon ug joker na Pari, ug sa uban nahadlok mapangutan-an adunay mga hunahuna na basig gamay na lang ang musimbahay tungod sa paagi o istilu ni Padre Edsel na kung maghomelya makiglambigit siya sa iyang mga nanimba sa pagsinati kon naminaw ba o kaha namati sa pagbasa pinaagi sa pagpangutana. Apan kanamo mga Pangulo sa GKK maningkamot sa pagpadayon sa misyon nga gisangon sa Ginoo ang pagpangalagad ug pagsangyaw sa Buhing Pulong sa Dios na makanunayon ug magmalahutayon modasig sa katawhan sa Dios inubanan sa panabang sa atong Mahal na Birheng Maria.

Nanghinaut ang tanan nga unta magtambayayong ug magmakanunayon kitang magmatinuud-anon sa atong misyon nga gisangon sa atong Ginoo ug atong tabangan ang atong bag-ong Kura Paroko sa tahas sa atong parokya sa pagpangalagad, pagsangyaw ug magmainampuon kita sa kanunay; nga magmalig-on kita sa atong pagpangalad kay diha adlaw adlaw natong paglakat sa kalibutan daghang tang mga pagsulay na masinati sa atong kinabuhi. (Rea A. Sarte | GKK Sec. Soccom)