Gahum sa Ebanghelyo

Ikanapulo’g Lima nga Dominggo sa Ordinaryong Panahon
Amos 7:12-15 / Efeso 1:3-14 o 1:3-10 / Markos 6:7-13

Si Edgar,usa ka manager sa usa ka bangko sa Manila. Nagpuyo sa kahimtang sa sala, diin bisan kon minyo siya , naghupot siya’g laing mga babaye sa iyang kinabuhi, matag gabii nagsugal ug sa kanunay hubog kon mouli sa ilang panimalay. Ang iyang asawa, adunay kinaiya nga nagasunod sa pamaagi ni Cristo, busa daku kayo ang pasensya nagdto sa iyang bana. Inubanan ang iyang kinaiya sa sa iyang mga buhat sa kalooy ngadto sa pag-alagad sa mga kabus sa ilang parokya. Usa ka gabii niana, siya ug ang iyang asawa, aduna untay adtuan nga party sa ilang paryente. Apan daw misakit ang ulo ni Edgar, busa nagpabilin siya sa balay kay buot niyang matulog ug sayo. Sa iyang pagkahinanok, nahigmata siya sa kusog nga dalogdog ug lite. Ang kahayag sa lite, nagpunting kanunay sa usa ka libro didto sa iyang aparador nga puno sa mga libro nga iyang napalit, kon moagi siya sa mga bookstores. Iyang gisusi kon unsang libro ang gisigihan sa paglamdag sa lite. Iyang nakita nga ang Bibliya diay ang gisigihan sa pag-igo sa kahayag. Busa iya kining gikuha ug gipakli, unya tukma usab kayo nga nabasahan dayon niya ang mga pulong sa Roma: 5:8-11. “Apan gipakita sa Dios kanato ang gidak-on sa iyang paghigugma kanato, kay sa makasasala pa kita nagpakamatay si Cristo alang kanato…” Wala siya masayod sa iyang gibati, nga diha-diha nakahilak siya kay iyang nakit-an sa pagbalik-lantaw ang iyang dautang kinabuhi. Wala siya kahibalo sa iyang gibuhat nga pagluhod atubangan sa krusipiho sa ilang kuwarto ug nagbakho sa tumang pagpangayo sa pasaylo sa Dios. Ang iyang asawa nga bag-ong nahiabot, nakakita ug nahingangha sa iyang pagkakita kang Edgar nga nagluhod ug nagbakho. Sukad niadtong panghitaboa, nabag-o ang iyang kinabuhi ug ang kinabuhi sa iyang pamilya.

Unsa ka gamhanan sa Ebanghelyo mao ang pinaka-unod sa atong ebanghelyo karong adlawa. Ang ebanghelyo mao ang Diosnong gahum sa kaluwasan. Kon kini ibalita ngadto sa katawhan, mahimo kining atong kaluwasan ug kapildihan. Kaluwasan kon ang maminaw, modawat niini ug mosunod sa tawag sa pagbag-o sa kinabuhi ug mosunod sa unsa man ang gihangyo niini. Apan kapildihan kon ang nakadungog niini, dili manumbaling sa unsay gitudlo. Sa laing pagkasulti, Ang Ebanghelyo naghatag kanto sa gahum sa pagpangayo sa pasaylo og moabli sa atong mga kasingkasing sa mabag-ohong gahum sa Espiritu Santo. Busa adunay kitay kapilian… tubagon ug buhaton, o magpaka-buta-bungol lamang sa tawag nga anaa sa Ebanghelyo. (Sr. Rica G. Dalaguit, fsp)