FLA annual gathering ipahigayon

Ipahigayon karong umaabot nga Hulyo 28, 2018 ang 8th Annual Assembly sa Family and Life Apostolate sa Archdiocese sa Davao, nga magsugod sa alas otso sa buntag hangtod sa alas kuatro sa hapon, sa San Pablo Parish Compound Pavilion, Juna Subdivision, Matina ning syudad sa Davao.

Sumala ni Rev. Fr. Orly Angelia, ang Director sa Family and Life Apostolate, nga gilauman nga motambong sa maong aktibidad ang mga lumilihok sa maong apostolado nga mga anaa sa Parokya ingon man ang Pangulo sa Kristohanong Banay gikan sa Gagmayng Kristohanong Katilingban kon GKK uban sa tema “Pamilya: Sukaranan sa Pangulong Maalagaron”.

Butyag ni Fr. Angelia nga tumong sa maong aktibidad nga ma-evaluate kon makumusta ang apostolado sa parokya ug GKK, ilabina nga nagsumikad ang bokasyon sa pagka-pari ug pagka-madre diha sa pamilya, butang nga mas maayo nga ang relasyon sa ginikanan ngadto sa ilang mga anak abunda ug puno sa pagmahal.

Apan giklaro sa maong pari nga bisan dili lumilihok sa apostolado diha sa Parokya ug GKK, pwede mo salmot sa maong aktibidad tungod ang tanan adunay katungod nga maka-amgo sa ka-importantsya sa pamilya.

Dugang ni Fr Angelia nga pagahisgutan sa maong aktibidad ang pagsaulog niining tuig sa ika 50 nga annibersaryo sa Humanae Vitae, may kalambigitan sa birth regulation ug transmission of life, mao ang agianan sa kinabuhi, sumala pa nga mao kini ang bokasyon sa magtiayon. Lakip na nga hisgutan ang mensahe ni Blessed Pope Paul VI, nga iyang gipaguwa niadtong 1968, kung aduna pa ba kini importante sa kasamtangang panahon. Ilabina nga nindot nga sundon ang kabubut-on sa Labawng makagagahom, alang sa maayo nga kaminyoon ug Pamilya, ang natural Family Planning subay sa Natural Law.